Скандинавтық жүріс депрессияны емдеуде тиімді нәтиже береді: ғалымдардың жаңа зерттеуі

Халықаралық зерттеушілер тобы скандинавтық жүрістің депрессиялық жағдайларға қарсы жоғары тиімділігін ғылыми тұрғыдан дәлелдеді. Жаңа зерттеу нәтижелері физикалық белсенділіктің науқастардың өмір сапасын қалпына келтірудегі маңызды құрал екенін көрсетеді.

Зерттеуге депрессияның орташа және ауыр сатысымен тіркелген, бұған дейін жүйелі түрде жаттығу жасамаған 64 адам қатысты. Бақылау тобы мен негізгі топқа бөлінген қатысушылар 10 апта бойы аптасына екі рет кәсіби нұсқаушының жетекшілігімен скандинавтық жүріспен айналысты. Жаттығу кезінде жүктеменің қалыпты деңгейде сақталуы арнайы пульсометрлер арқылы қадағаланып отырды. Прогресті бағалау үшін «Бек депрессия сауалнамасы-II» (BDI-II) халықаралық әдістемесі қолданылды.

Ғалымдар бақылаулы физикалық жаттығулардың депрессия симптомдарын едәуір төмендететінін анықтады. Депрессияның ауыр түрімен ауыратын қатысушыларда жағдайдың жақсаруы алғашқы бес аптада-ақ байқалған. 10 апталық курстың қорытындысы бойынша, скандинавтық жүріспен айналысқан топтың 53,6%-ында клиникалық депрессия белгілері сейіліп, ремиссия тіркелді.

Зерттеушілердің пікірінше, скандинавтық жүріс - депрессиямен күресудің қолжетімді, қарапайым және тиімді әдісі. Бұл нәтижелер бұған дейінгі америкалық ғалымдардың депрессияны ми динамикасының бұзылуы деп сипаттайтын тұжырымдамасымен де үндеседі: физикалық белсенділік мидың қалыпты жұмыс режиміне қайта оралуына және негативті паттерндерден шығуына көмектеседі.

Бұл нәтижелер скандинавтық жүрісті медициналық оңалту бағдарламаларына қосымша терапия ретінде енгізудің орындылығын растайды.