«СК-Фармация» бюджетке 35 млрд теңге шығын келтірді деген күдікпен тергеліп жатыр

Бас прокуратура «СК-Фармация» ЖШС-нің қызметіне қатысты қылмыстық іс қозғап, сотқа дейінгі тергеп-тексеру жұмыстарын бастады. Бұл туралы Мәжіліс депутаты Бақытжан Базарбек өзінің Facebook парақшасында хабарлады.

Аталған тергеу Жоғары аудиторлық палата анықтаған заңбұзушылықтар негізінде, депутаттар Бақытжан Базарбек пен Мұрат Әбеновтің бастамасымен қолға алынды. Тергеу барысында компанияның дәрі-дәрмек сатып алу кезінде мемлекетке 35,8 млрд теңге көлемінде зиян келтіргені туралы мәліметтер қарастырылып жатыр.

Сонымен қатар фармацевтика саласындағы басқа да субъектілердің қызметі тексеріледі. Атап айтқанда:

• «Ғылыми орталық» АҚ тарапынан 166,4 млн теңгеге жалған клиникалық зерттеулер жүргізілгені,

• 36,7 млн теңге көлеміндегі жабдыққа негізсіз қаражат жұмсалғаны,

• «КазМедПром» ЖШС тарапынан медициналық қолғаптарды артық бағамен сатып өткізіп, бюджетке 5,3 млрд теңге көлемінде тиімсіз шығын келтіргені тіркелген.

Сондай-ақ Алматы қаласының прокуратурасына 200 млн теңгеден астам қаржыны тиімсіз пайдалану және жалған зерттеулер бойынша тексеру жүргізу туралы тапсырма жіберілген.

Бұдан бөлек, Бас прокуратура «СК-Фармация» мен Дәрілік заттар мен медициналық бұйымдарды сараптау ұлттық орталығына қатысты қосымша тексерістер басталғанын хабарлады.

Еске салайық, шілде айының басында депутаттар «СК-Фармация», «Медсервис-Плюс» компаниялары мен тиісті комитеттердің қызметін жан-жақты тексеруді сұрап, Бас прокуратураға ресми хат жолдаған болатын. Сол күні «СК-Фармацияның» жаңа басшысы болып Нұрлыбек Асылбеков тағайындалған.