СІМ соғыс аймағындағы қазақстандықтарды елге қайтару үшін Ресеймен келіссөз жүргізіп жатыр

Қазақстан Сыртқы істер министрлігі соғыс қимылдары жүріп жатқан аймақта жүрген Қазақстан азаматтарын елге қайтару үшін Ресей тарапымен келіссөз жүргізіп жатыр. Министрлік бұқаралық ақпарат құралдарында қазақстандықтардың елге оралуға жәрдем сұраған өтініштері тарағаннан кейін арнайы мәлімдеме жасады.

СІМ мәліметінше, бірнеше отбасы министрліктен көмек сұрап үлгерген. Ведомство соғыс аймағындағы қазақстандықтар туралы толық мәліметті олардың өзінен немесе туыстарынан тікелей жинап жатыр. Ол үшін арнайы жедел желілер жұмыс істейді.

Министрлікке азаматтың аты-жөні, туған күні, болжамды жүрген жері және жасасқан еңбек шартының талаптары туралы мәлімет қажет.

Қазақстандықтарды елге қайтару жолдарын қарастыру үшін СІМ Ресей тарапымен консультацияны жалғастырып жатыр. Бүгін Қазақстан Сыртқы істер министрі Ресейдің Қазақстандағы уақытша сенімді өкілімен кездескен. Ал жақын арада Қазақстанның Ресейдегі елшісі Ресей Сыртқы істер және Қорғаныс министрліктерінің басшылығымен кездеседі.

Қазақстан заңнамасында мемлекет өз азаматтарын шетелде қорғауға және оларға қолдау көрсетуге кепілдік беретіні бекітілген. 

Соғыс аймағында жүрген азаматтарға қатысты ақпаратты СІМ Консулдық қызмет департаментінің +7 (7172) 72-05-00 нөміріне немесе Қазақстанның Ресейдегі елшілігі мен Астрахань, Қазан, Омбы, Екатеринбург және Санкт-Петербургтегі бас консулдықтарына беруге болады.

Бұған дейін Ресейге жұмыс істеуге кеткен Мирас Тасжарғанов Қазақстан билігінен елге қайтаруға көмектесуді сұраған. Оның анасы Гүлжан Тасжарғанованың айтуынша, ұлы интернеттегі хабарландыру арқылы жұмыс тауып Ресейге барған, кейін Ресей Қорғаныс министрлігімен келісімшартқа отыруға мәжбүр болған. 17 қыркүйекте Қазақстан елшілігінің консулдық бөлімі Мирас Тасжарғановпен байланысқан. Ол өзімен бірге осындай жағдайға тап болған тағы бірнеше Қазақстан азаматы бар екенін айтқан. 18 қыркүйекте Қазақстанның Ресейдегі елшілігі оларды елге қайтаруға жәрдемдесуді сұрап, Ресей СІМ-не нота жолдады. 

2 қазанда тағы екі қазақстандықтың туыстары көмек сұрап отырғаны белгілі болды. Айнабек Келдібек пен Нұржан Әдиетов Ресейге жұмыс істеуге барған, кейін жақындарына Ресей әскеріне күштеп тартылғанын хабарлаған. Бұл – олардың өздері мен туыстарының мәлімдемесі.