Silk Way Star: мәдениет арқылы бейбітшілікке қадам

Британдық BBC корпорациясы Армения мен Әзірбайжан арасындағы ықтимал бейбіт келісім мәселесіне арналған сараптамалық материалында Қазақстанда болған мәдени оқиғаға назар аударды. Басылымда Астанада өткен Silk Way Star халықаралық ән байқауындағы эпизод гуманитарлық диалогтың жарқын көрінісі ретінде бағаланған.

Мақалада соңғы 30 жылдан астам уақытқа созылған қақтығыстан кейін Армения мен Әзірбайжан қоғамында татуласуға деген ұмтылыс байқалатыны айтылған. Бұл үрдіс тек саяси келіссөздер аясында ғана емес, сондай-ақ мәдени және бейресми алаңдарда да көрініс табуда.

Осындай символдық сәттердің бірі 2024 жылғы қарашада Астанада өткен байқау барысында орын алған. Жобаға Қазақстан Республикасы Президентінің Телерадиокешені мен China Media Group серіктестік еткен. Байқауда қазылық жасаған әзірбайжандық әнші Samira Efendi армениялық орындаушы Saro Gevorgyan жоғары ұпай беріп, көпшілік алдында оны құттықтап, құшағына алған.

BBC-дің атап өтуінше, мұндай қадамдар ұзақ жылдарға созылған текетірес жағдайында айрықша мәнге ие. Бұл қарапайым азаматтардың бейбіт өмірге деген сұранысын және өзара түсіністікке ұмтылысын білдіреді. Әзірбайжандық әнші өз кезегінде мұндай шешімнің сын тудыруы мүмкін екенін түсінгенін, алайда диалог жолын таңдауды жөн санағанын жеткізген.

Сондай-ақ мақалада аталған оқиғаның бейтарап әрі мәдениетаралық диалог алаңы саналатын Қазақстанда өткені ерекше атап өтіледі.

Еске сала кетейік, Silk Way Star – Президент Телерадиокешені мен China Media Group-тің бірлескен жаңа жобасы. Астанада ұйымдастырылған байқау Азия елдерінің жетекші телеарналарынан көрсетілді. Финалдық кезеңнің тікелей эфирін Jibek Joly телеарнасы жүргізсе, параллель трансляциялар Әзірбайжан, Тәжікстан, Қырғызстан және Моңғолия елдерінде ұйымдастырылды.