Шымкенттің экс-замәкімі 8,5 жылға сотталды

Шымкентте қала әкімінің орынбасары болған Мақсұт Исахов 8,5 жылға сотталды. 

Қалалық қылмыстық істер жөніндегі мамандандырылған ауданаралық сотта Қылмыстық кодекстің 367-бабы 4-бөлігімен («Аса ірі мөлшерде пара беру») бойынша қозғалған қылмыстық іс қаралды.

"Мақсұт Исахов Шымкент қаласы әкімінің орынбасары бола тұра, Қылмыстық кодекстің 362-бабы 4-бөлігінің 3) тармағымен Шымкент қаласы ҰҚК департаментінде әкімшіліктің лауазымды тұлғаларына қатысты қозғалған іс бойынша лауазымды тұлға – Шымкент қаласы бойынша ҰҚК Департаментінің бірінші орынбасары С-ға істі қысқарту үшін 200 мың доллар яғни аса ірі мөлшерде пара беруге оқталған", – делінген хабарламада.

Сотталушының кінәсі куәлердің жауаптарымен, сот сараптамаларының қорытындыларымен, ЖТӘ нәтижелерімен және басқада іс құжаттарымен дәлелденеді.

Сот жарыссөзінде мемлекеттік айытпаушы айыпты Қылмыстық кодекстің 367-бабы 4-бөлігінен Қылмыстық кодекстің 24-бабы 3-бөлігі – 367-бабы 4-бөлігіне қайта саралап, аса ірі мөлшерде пара беруге оқталу деп өзгертіп, сотталушыға 8 жыл 5 айға бас бостандығынан айыруды сұрады.

Қорғау тарапы Мақсұт Исаховты әрекетінде қылмыстың құрамы болмауына байланысты ақтауды сұрады.

Жаза тағайындау барысында сот Мақсұт Исаховты қылмыстық жауапкершілігін жеңілдететін мән-жай ретінде асырауында балалар барын ескерді.

"Сот Мақсұт Исаховты аса ірі мөлшерде пара беруге оқталуды деген айып бойынша кінәлі деп тауып, Қылмыстық кодекстің 55-бабы 2-бөлігі, 56-бабы 3-бөлігін қолданып, мемлекеттік қызметте лауазымды қызмет атқару құқығынан өмір бойына айырып, 8 жыл 5 ай 7 күн бас бостандығынан айыру жазасын тағайындады", – делінген хабарламада.