Шымкенттің экс-әкімі жаңа қызметке тағайындалды

Бұрынғы мәдениет вице-министрі әрі Шымкенттің экс-әкімі Ғабидолла Әбдірахымов «Samruk-Kazyna Construction» АҚ басқарма төрағасының пайдалану мәселелері жөніндегі орынбасары қызметіне тағайындалды. Бұл туралы компанияның баспасөз қызметі хабарлады.

Ресми мәліметке сәйкес, Әбдірахымов аталған лауазымға 2025 жылғы 29 желтоқсанда кіріскен. Алайда ол компания басқармасының мүшесі болып саналмайды.

Ғабидолла Әбдірахымовтың экономикалық және басқару саласында білімі бар. Ол «Болашақ» бағдарламасы аясында мемлекеттік басқару мамандығы бойынша магистр дәрежесін алған. Әр жылдары мемлекеттік қызмет жүйесінде, Президент әкімшілігінде, Үкіметте басшылық қызметтер атқарып, Шымкент қаласының әкімі, сондай-ақ мәдениет және спорт вице-министрі болған.

Айта кетейік, Әбдірахымов 2015–2017 және 2018–2019 жылдары Шымкент қаласының әкімі қызметін атқарды. 2019 жылғы шілдеде ол бұл лауазымнан босатылды. 

Оның қызметтен босатылуына дейін Лондонға сапары кезінде The Ritz қонақүйінің жанында түсірілген бейнежазба қоғамда резонанс тудырған. Аталған видеода ол Ұлыбритания астанасынан сәлем жолдап, қазақстандықтарды елде өмір сүріп, Қазақстанда еңбек етуге үндеген.

2019 жылғы қарашадан бастап ол Қазақстан Республикасы Премьер-министрінің кеңесшісі, кейіннен мәдениет және спорт вице-министрі қызметтерін атқарды. Алайда 2021 жылғы 1 қазанда аталған қызметтен босатылды.