Шымкентті жағымсыз иіс жайлады: әкім оның көзін табуды тапсырды

Шымкент тұрғындары қаланың кейбір өндірістік аймақтары маңынан шығатын жағымсыз иіске шағынды. Қала әкімі Ғабит Сыздықбеков экологтарға иістің нақты қайдан шығатынын анықтауды тапсырды, деп хабарлады әкімдік.

Тұрғындар әсіресе кешкі және түнгі уақытта «Оңтүстік» және «Ордабасы» индустриялық аймақтарына іргелес аумақтардан, сондай-ақ «Петро Қазақстан Ойл Продактс» ЖШС орналасқан маңнан жағымсыз иіс шығатынын айтқан.

Экология департаменті мен Ұлттық сараптама орталығының мамандары бір ай бойы ауа құрамын өлшеген. Зерттеу кезінде кейбір ластаушы заттардың мөлшері рұқсат етілген шектен асқаны анықталды. Алайда жағымсыз иістің нақты қай нысаннан шығып жатқаны әзірге анықталған жоқ.

Сыздықбеков ауа құрамын өлшеуді жалғастырып, тексеруді кешкі және түнгі уақытта да жүргізуді тапсырды. Мамандар иістің нақты көзі мен себебін анықтауы керек.

Әкімдік мәліметінше, Шымкенттегі тұрақты ластаушы көздерден бөлінетін шығарындылар кейінгі үш жылда 31,6 мың тоннадан 47,08 мың тоннаға дейін өскен.

Жыл басынан бері Экология департаменті өндіріс орындарында 37 тексеру жүргізіп, 37 нұсқама берген және 64 әкімшілік іс қозғаған. Салынған айыппұл көлемі 505 млн теңгеден асты. Өрескел заң бұзған кей кәсіпорындардың жұмысы сот шешімімен уақытша тоқтатылған.

Қазір Шымкентте ауаның жағдайын бақылайтын алты автоматты бекет бар. Қалада халық саны мен өндіріс көлемінің өсуіне байланысты олардың санын 15–20-ға дейін көбейту ұсынылды. Әкім қолданыстағы бекеттердің орналасуын қайта қарап, қосымша бақылау нүктелерін белгілеуді тапсырды.