Шымкенттегі ықшамаудан ішімдіктен бас тартты

Шымкент қаласы Шапырашты ықшамауданының тұрғындары салауатты өмір салтын ұстанып, ішімдіктен толығымен бас тартты. Бұл бастама үш жыл бұрын ақсақалдардың ұсынысымен қолға алынып, қазір тұтас қауымның күнделікті өмір сүру ережесіне айналды. Бұл жөнінде 24.kz хабарлады.

Ішімдіктен бас тартудың нәтижесі қандай?

Шапырашты тұрғын үй алабында шамамен 400-ден астам адам тұрады. Мұндағы дүкендерде арақ-шарап мүлдем сатылмайды, ал тұрғындар отбасылық шаралар мен мерекелік күндерді ішімдіксіз атап өтеді. Жастар арасында да зиянды әдеттерге бейімділік жоқ.

Қала тұрғыны Нұрмахан Бекбосынов бұл үрдісті ақсақалдардың тәрбиесімен байланыстырады.

"Қазақта «Қарттарының айтатын өсиеті болмаса, жастарының қасиеті болмайды» деген жақсы сөз бар. Бұл жастарға үлкендердің көрсеткен үлгісі", — деді ол.

Тұрғындар арасында сұраныс қалай өзгерді?

Дүкен иелері ішімдік саудасынан бас тартқаннан кейін ешқандай шығын көрмегенін айтады. Керісінше, көкөністер, жеміс-жидектер және сүт өнімдеріне сұраныс артқан.

Дүкен иесі Әлия Матованың айтуынша, ауыл жастары да ішімдікке әуес емес. Азық-түлік сатылымы жақсы жүріп жатыр. 

Ішімдіктен бас тарту қоғамдық тәртіпке қалай әсер етті?

Шапырашты ықшамауданындағы учаскелік полиция инспекторының мәліметінше, соңғы үш жылда құқықбұзушылық деректері тіркелмеген.

"Тұрмыстық зорлық-зомбылық, көше төбелесі немесе ұрлық сияқты заңбұзушылық мүлдем жоқ. Соңғы үш жылда полицияға бірде-бір шақырту түскен жоқ", — деді учаскелік инспектор Талғат Алдияров.

Жаңа нысандар мен тұрғындардың көбеюі

Шапырашты елді мекенінде әлеуметтік нысандар жеткілікті. Жақында 1200 адамға арналған заманауи спорт кешені, мәдениет үйі және ұлттық ат спортына арналған стадион ашылған. Қазір бұл ықшамаудан үлгілі елді мекен ретінде танылып, көшіп келушілердің саны жыл сайын артып келеді.