Шымкенттегі өліммен аяқталған төбелес: төрт күдікті ұсталды

Шымкентте жол-көлік оқиғасынан соң болған қанды жанжалға байланысты төрт күдікті ұсталды. Бұл туралы қалалық полиция департаменті мәлімдеді.

Полицияның хабарлауынша, аталған тұлғаларға адам өлтіру және бұзақылық деректері бойынша күдік келтіріліп отыр. Барлығы уақытша ұстау изоляторына қамалған.

Қазіргі таңда жедел-іздестіру шаралары жалғасып жатыр. Оқиға бойынша «Адам өлтіру», «Бұзақылық» және «Адам ұрлау» баптары бойынша қылмыстық іс тіркелген. Күдіктілерді анықтау және ұстау мақсатында құқық қорғау органдарының барлық ресурсы жұмылдырылған.

Тәртіп сақшылары оқиғаның мән-жайын жан-жақты тексеріп жатыр.

Айта кетейік, қақтығыс 20 қаңтар күні жол апатынан кейін туындаған. Көлік жүргізушілері мен жолаушылар арасындағы жанжал төбелеске ұласып, салдарынан бірнеше адам пышақ жарақатын алған. Олардың бірі алған жарақатынан көз жұмды. Тағы бір азамат – 36 жастағы ер адам ауыр жағдайда медициналық мекемеге жеткізілген.