Шымкенттегі өліммен аяқталған төбелес: тірі қалған азаматтың жағдайы белгілі болды

Шымкент қаласында адам өлімімен аяқталған жаппай төбелес кезінде ауыр жарақат алған ер адам жансақтау бөлімінен хирургиялық бөлімшеге ауыстырылды. Қалалық денсаулық сақтау басқармасының хабарлауынша, 36 жастағы науқастың жағдайы тұрақты, орташа ауыр деп бағаланып отыр. Барлық өмірлік көрсеткіштері қалыпты, тиісті медициналық көмек көрсетіліп жатыр.

Қайғылы оқиға 20 қаңтарда жол-көлік оқиғасынан кейін өрбіген. Алдын ала мәліметтерге сәйкес, апат қылмыстық жанжалдың бүркемесі болуы мүмкін. Қақтығыс салдарынан 40 жастағы Василий Колесников көз жұмған. Ол күштеп әкетіліп, кейін Түркістан облысы аумағынан өлі табылған.

Тағы бір жәбірленуші ауыр пышақ жарақаттарымен ауруханаға жеткізіліп, дәрігерлер оған шұғыл хирургиялық көмек көрсеткен. Қазіргі таңда оның жағдайы дәрігерлердің бақылауында.

Оқиғаға байланысты бірнеше қылмыстық іс қозғалды. Құқық қорғау органдары төбелеске қатысы бар жеті адамды ұстаған. Қазір тергеу жұмыстары жалғасып жатыр.