Шымкентте мұғалім 7 жасар оқушыға жыныстық сипатта тиісті деген күдікке ілінді

Шымкент қаласында орта мектеп мұғалімі 7 жасар қыз балаға қатысты «жыныстық сипаттағы іс-әрекеттер жасады» деген күдікке ілінді. Ақпарат алдымен әлеуметтік желілерде тарады. Кейін қалалық Полиция департаменті күдіктінің ұсталғанын мәлім етті. Бұл жөнінде Otyrar хабарлады.

Оқушының анасының мәлімдеуінше, оқиға сабақ уақытында болған. Қыз бала анасына мұғалімнің оны тізесіне отырғызып, әдепсіз әрекеттер жасағанын айтқан. Алғашында мектеп әкімшілігі ата-анаға бейнебақылау камераларындағы жазбаларды көрсетпеген. Іске полиция араласқаннан кейін ғана бейнежазбаларды алу мүмкін болған.

Шымкент қалалық ПД өкілдері күдіктінің полиция бөлімшесіне жеткізілгенін хабарлады.

«Құқыққа қайшы әрекеттер жасады деген күдікпен Шымкент қаласының тұрғыны ұсталып, полиция бөліміне жеткізілді. Қазіргі уақытта жедел-тергеу тобы оқиғаның мән-жайын жан-жақты, толық және объективті анықтауға бағытталған іс-шаралар кешенін жүргізіп жатыр», – делінген хабарламада.

Полиция бейнекамера жазбаларын зерттеп, куәгерлерден жауап алып жатыр. Тергеу барысы департамент басшылығының бақылауына алынды.