Шымкентте қызметкерлерді лайк басуға мәжбүрлеген жастар орталығының басшысы жазаланды

Шымкенттегі Жастар ресурстық орталығының басшысы қызметкерлерді әлеуметтік желідегі жазбаларға лайк басуға мәжбүрлегені үшін тәртіптік жазаға тартылды. Бұл туралы «31 арна» хабарлады.

Орталық қызметкерлерінің айтуынша, олар орталықтың жазбаларына лайк баспағаны үшін жазбаша сөгіс алып, ауызша ескерту естіген. Тіпті, басшылық лайк пен пікір қалдырмаған қызметкерлердің аты-жөнін арнайы тізімге енгізіп отырған.

Қалалық ішкі саясат және жастар істері жөніндегі басқарма бұл жағдайды екі қызметкер арасындағы ішкі жанжал деп бағалап отыр. Басқарма басшысы Айгерім Жұмағұлованың айтуынша, оған ешкім ресми түрде шағым түсірмеген, ал «е-Өтініш» платформасы арқылы ресми шағым жазбалар жарияланған соң бір күннен кейін ғана түскен.

"Қазір әлеуметтік желіде шу шығарып, содан кейін ғана мәселені қарау сәнге айналғандай. Бұл жағдайда орталық басшысы шектен шықты деуге болады. Қызметкерлерді лайк басуға мәжбүрлеу дұрыс емес. Егер расымен әлеуметтік желідегі белсенділікті арттырғысы келсе, тартымды контент жасаумен айналысуы керек", — деді Айгерім Жұмағұлова.

Қазіргі таңда Жастар ресурстық орталығының басшысына тәртіптік жаза қолданылды.