Шымкентте кәсіпкерден 20 млн теңге бопсалаған ер адам ұсталды

Шымкент қаласында кәсіпкерден 20 млн теңге талап еткен ер адам қолға түсті. Бұл туралы Шымкент қалалық полиция департаменті хабарлады.

Полиция дерегінше, күдікті бірнеше рет қоғамдық тамақтану орнына келіп, нысанды бейнетаспаға түсірген. Кейін сол жазбаларды сылтау етіп, кәсіп иесіне қысым көрсетіп, тексерістер ұйымдастыратынын айтып қорқытқан әрі «бизнесті жаптырамын» деп қоқан-лоқы жасаған.

Осылайша бопсалау мен қорқыту арқылы ер адам кәсіпкерден 20 млн теңге талап еткен.

Күдікті ұсталып, уақытша ұстау изоляторына қамалды. Аталған дерек бойынша бопсалау фактісімен қылмыстық іс қозғалып, тергеу амалдары жүргізіліп жатыр.