Шымкент мұнай өңдеу зауытында болған қайғылы оқиғадан екі адам қаза тапты

Шымкенттегі мұнай өңдеу зауытында оқшаулау жұмыстары кезінде автокөтергіш аударылып, екі жұмысшы қаза тапты. Қайғылы оқиға 26 тамыз күні сағат 14:30 шамасында «ПКОП» ЖШС-нің өндірістік алаңында болған, деп хабарлады ҚазАқпарат.

Компанияның ресми мәліметінше, қаза тапқандар – мердігер ұйым «КРС Астана» ЖШС-нің оқшаулаушы мамандары. «PetroKazakhstan Oil Products» компаниясының басшылығы марқұмдардың отбасылары мен жақындарына қайғырып көңіл айтты.

Апаттың нақты себебін анықтау үшін арнайы жұмыс тобы құрылды. Зауыттың қызметі қалыпты режимде жалғасып жатыр.

Оқиғаға байланысты қылмыстық іс қозғалды. Полицияның хабарлауынша, тергеу «еңбек қауіпсіздігі ережелерін бұзу салдарынан адамдардың қаза болуы» бабы бойынша жүріп жатыр.

«Қазіргі уақытта оқиғаның барлық мән-жайын анықтауға бағытталған кешенді тергеу амалдары жүргізіліп жатыр. Тергеу аяқталған соң іс бойынша процессуалдық шешім қабылданады», – деп мәлімдеді Шымкент қалалық полиция департаменті.