Шымкент әкімінің орынбасарына жасалған қастандық: прокурор айыпталушыға 11 жыл 3 ай түрме жазасын сұрады

Шымкент қаласы әкімінің орынбасары Руслан Берденовке жасалған қастандық ісі бойынша сотта прокурор айыпталушы Ернар Жиембайды 11 жыл 3 айға бас бостандығынан айыруды сұрады.

Сот жарыссөзінде мемлекеттік айыптаушы Бауыржан Қараманов алғашқылардың бірі болып сөз сөйлеп, оқиғаның мән-жайын баяндады. Оның айтуынша, айыпталушының кінәсі куәгерлердің жауабы және өзге де дәлелдермен толықтай расталған.

Прокурор Ернар Жиембайдың ісінде жеңілдететін және ауырлататын жағдайлар барын атап өтті. Жеңілдететін фактор ретінде оның кәмелетке толмаған балаларының барын, ал ауырлататын жағдай ретінде қылмысты мас күйінде жасағанын көрсетті.

Айыпталушыға Қылмыстық кодекстің екі бабы бойынша айып тағылған:

• 99-бап, 1-бөлік – «Адам өлтіру»;

• 24-бап, 3-бөлік – «Қылмысқа дайындалу және қылмысқа оқталу, бірақ оны аяқтауға айыпталушының еркінен тыс жағдайлар кедергі келтіруі».

Еске сала кетсек, 21 сәуірде Руслан Берденовке Шымкент әкімдігі ғимараты маңында оқ атылған. Ол ауыр жарақатпен ауруханаға жеткізіліп, бірнеше рет ота жасалды. Соңғы операция 13 тамызда өткен.

Бұл істің басты айыпталушысы – қалалық құрылыс басқармасына қарасты «Тұрғын үй Шымкент» ЖШС-нің бұрынғы директоры Ернар Жиембай.