Шымбұлақтағы тіл дауы: сот екі тарапқа да айыппұл салды

Алматы қаласындағы Шымбұлақта болған жанжалға байланысты полиция ресми мәлімдеме жасады.

Алматы қаласы Медеу аудандық полиция басқармасы хабарлауынша, тексеру барысында оқиға тараптардың эмоцияға берілуінен туындағаны анықталған. Қатысушылардың айтуынша, кейбір сөздер мен әрекеттер сол сәттегі көңіл күйдің әсерінен жасалып, олардың шынайы ұстанымын білдірмейді.

Мәлімдемеде жанжал кезінде тараптардың бір-біріне жеңіл физикалық әрекет қолданғаны тіркелгені де көрсетілген. Алайда кейін қатысушылар өзара кешірім сұрап, татуласқан. Олар болған жағдайға өкініш білдіріп, азаматтарды бір-біріне құрметпен қарауға және кез келген келіспеушілікті бейбіт жолмен шешуге шақырған.

Аталған дерек бойынша екі адамға да ұсақ бұзақылық фактісімен әкімшілік іс қозғалған. Сот шешімімен әрқайсысына 20 айлық есептік көрсеткіш мөлшерінде, яғни 78 640 теңге айыппұл салынған.

Еске салайық, бұған дейін әлеуметтік желілерде Шымбұлақтағы мейрамханалардың бірінде қазақ тіліне қатысты дау туындағаны туралы ақпарат тараған болатын.