Шымбұлақтағы қазақ тіліне қатысты даулы оқиға қалай шешілді?

Шымбұлақтағы тау-шаңғы курортында орналасқан Gusto мейрамханасында қазақ тілінде қызмет көрсетуден бас тартқан қызметкерге қатысты ішкі тексеру аяқталды. Нәтижесінде мейрамхана әкімшісінің еңбек шарты тоқтатылды.

Gusto мейрамханасының хабарлауынша, 21 желтоқсанда болған оқиғадан кейін жүргізілген тексеру сервис стандарттары мен корпоративтік коммуникация талаптарының бұзылғанын көрсеткен. Осыған байланысты басқарушылық шешім қабылданып, әкімшінің қызметі тоқтатылған.

– Қабылданған шешім тек ішкі шара болып табылады және оқиғаға қатысушылардың әрекеттеріне құқықтық баға беруді көздемейді. Оқиғаға қатысты мәселе заңнамада белгіленген тәртіппен тараптардың қатысуымен әрі қарай қаралады, – делінген мейрамхана таратқан ақпаратта.

Еске салсақ, бұған дейін әлеуметтік желілерде Gusto мейрамханасында болған жанжал кеңінен талқыланды. Келуші мейрамхана қызметкері қазақ тілінде қызмет көрсетуден бас тартып, «қазақша сөйлеуге міндетті емес екенін» айтқанын мәлімдеген. Видеода өзін әкімші ретінде таныстырған әйел клиенттің өтінішіне дөрекі жауап беріп, кеңес дәуірінде туғанын және қазақ тілінің қажеті жоқ екенін айтқан.

Видео авторының сөзінше, ол қазақ тілін білетін қызметкер бар-жоғын сұрағаннан кейін жағдай ушығып, әкімші оны сыртқа шығарып жіберуге тырысқан. Кейін полиция шақырылып, оқиға бірнеше сағатқа созылған. Осы уақытта туристер суықта күтуге мәжбүр болған.

Ал әкімші өз кезегінде жеке парақшасында жағдайға қатысты пікір білдіріп, клиенттің күш қолданғанын және видео жариялаймын деп қорқытқанын айтқан. Сондай-ақ ол қазақ тілін ішінара түсінетінін мәлімдеген.

Жанжалдан кейін бір тәулік ішінде 2GIS сервисіндегі мейрамхана парақшасына 27 мыңнан астам теріс пікір жазылып, көпшілік қызметкерді жұмыстан босатып, мемлекеттік тілге құрмет көрсетуді талап етті.

Gusto мейрамханасы Instagram парақшасында Қазақстан Республикасының заңдарын және мемлекеттік тілді құрметтейтінін, қызмет көрсету қазақ, орыс және ағылшын тілдерінде жүргізілетінін мәлімдеді. Ішкі тексеру қорытындысы бойынша әкімші жұмыстан шығарылды.