Шығыс Қазақстанда заңғар ақын Жамбыл Жабаевтың мерейтойына орай мәдени шара ұйымдастырылады

8 мамыры күні сағат 11:00-де Өскемен қаласындағы Жамбыл атындағы мәдениет және демалыс саябағында қазақ халық поэзиясының алыбы, әйгілі жырау әрі жыршы Жамбыл Жабаевтың туғанына 180 жыл толуына орай «ХХ ғасырдың Гомері» атты салтанатты әдеби ревю өтеді. Бұл туралы Шығыс Қазақстан облыстық мәдениет басқармасы хабарлайды.

Ұйымдастырушылардың мәліметінше, мәдени іс-шараның басты мақсаты - ұлттық әдебиет пен өнердің дамуына өлшеусіз үлес қосқан мемлекеттік сыйлықтың лауреаты Жамбыл Жабаевтың шығармашылық мұрасын ұлықтау, сондай-ақ ақынның бай рухани қазынасын өскелең ұрпаққа заманауи және қолжетімді форматтар арқылы насихаттау болып табылады. Аталған жоба аясында А.С. Пушкин атындағы Шығыс Қазақстан облыстық кітапханасының мамандары дәстүрлі құндылықтар мен жаңа технологияларды ұштастыратын бірнеше тақырыптық және интерактивті алаңдар дайындаған.

Мерекелік бағдарламаның орталық бөлігі ретінде «Айтыс алаңы» ұйымдастырылады. Аталған зияткерлік және шығармашылық сайыста аймақтың жас сөз шеберлері мен суырыпсалма ақындары бақ сынап, импровизациялық шеберліктерін ортаға салады. Сондай-ақ, жастардың қызығушылығын арттыру мақсатында саябақ аумағында арнайы заманауи поэтикалық квест өткізу жоспарланған. Квест шарты бойынша қатысушылар инновациялық QR-кодтарды қолдана отырып, Жамбыл Жабаевтың түрлі шығармаларынан жасырылған өлең жолдарының үзінділерін іздеп тауып, тұтас мәтінді құрастыруы тиіс.

Мәдени жоба аясында өтетін «поэтикалық парад» барысында ұлы жыраудың туындылары мәнерлеп оқылып, дәстүрлі музыкалық өнер шеберлерінің орындауындағы ұлттық термелер мен халық әндері шырқалады. Салтанатты шара аясында ақынның өмірі мен шығармашылық жолына, сондай-ақ оның еңбектерін зерттеген ғалымдардың ғылыми еңбектеріне арналған кең көлемді әдеби-деректі кітап көрмесі көпшілік назарына ұсынылатын болады.

Еске сала кетейік, Жамбыл Жабаев - шығармалары әлемнің ондаған тілдеріне аударылған, Сүйінбай Аронұлы секілді тұлғалардан тәлім алып, Кенен Әзірбаев сынды өнерпаздарға ұстаздық еткен қазақ руханиятының бірегей өкілі. Ауқымды іс-шараның ресми ашылу рәсімі саябақтағы ақын ескерткішінің жанында басталады. Ұйымдастырушылар қала тұрғындары мен қонақтарын, сондай-ақ БАҚ өкілдерін мәдени шараны бірге тамашалауға шақырады.