Шығыс Қазақстанда судағы қауіпсіздік күшейтілді: екі жаңа құтқару нысаны ашылды

Шығыс Қазақстан облысында судағы қауіпсіздікті күшейтуге бағытталған екі жаңа құтқару нысаны жұмысын бастады. Өскемендегі Ертіс өзенінің жағасында заманауи құтқару станциясы пайдалануға берілсе, Алтай ауданындағы Бұқтырма су қоймасында жаңа құтқару модулі іске қосылады.

Өскемендегі құтқару станциясы тұрғындар көп демалатын «Самал» саябағы аумағында орналасқан. Мұнда төрт құтқарушы тұрақты кезекшілік атқарады. Мамандарға өзен аумағын бақылауға және төтенше жағдай кезінде жедел көмек көрсетуге қажетті жабдықтар берілген. Станция қарамағында «Қазбот-53» металл қайығы мен гидроцикл де бар.

Жаңа нысанның ашылу рәсіміне Шығыс Қазақстан облысының әкімі Нұрымбет Сақтағанов пен ҚР Төтенше жағдайлар министрі Шыңғыс Әрінов қатысты.

Облыс әкімі құтқару станциясының ең басты міндеті адам өмірін қорғау екенін атап өтті.

«Бүгін Өскеменнің көрікті орындарының бірі – «Самал» саябағында маңызды нысанды ашып отырмыз. Бұл – ең алдымен адамдардың өмірі мен қауіпсіздігін қорғауға бағытталған заманауи құтқару станциясы. Біз үшін кез келген инфрақұрылымдық жобаның басты өлшемі – оның адамға пайдасы. Жаңа станция құтқарушылардың жұмысын тиімді ұйымдастырып, су айдынын тұрақты бақылауға және төтенше жағдай кезінде қажетті көмекті дер кезінде көрсетуге мүмкіндік береді», – деді Нұрымбет Сақтағанов.

Өңірдегі судағы қауіпсіздік инфрақұрылымы Бұқтырма су қоймасындағы жаңа құтқару модулімен де толықты. Биыл салынған нысанда бақылау бекеті мен мамандар жұмыс істейтін арнайы бөлме қарастырылған.

Жаңа модуль жағалауда бұған дейін жұмыс істеп келген құтқару бөлімшесінің мүмкіндігін кеңейтеді. Соның арқасында су қоймасының аумағын бақылау күшейіп, оқыс жағдайларға әрекет ету уақыты қысқарады деп күтілуде. Екі жаңа құтқару постының капсулаларының кілттерін облыс әкімі Нұрымбет Сақтағанов табыстады.

«Жаңа нысандар қауіпсіздік жүйесін одан әрі күшейтіп, өңірдегі су айдындарында демалуды тұрғындар үшін қауіпсіз етуге мүмкіндік беретініне сенімдімін», – деді өңір басшысы.

Құтқару инфрақұрылымын кеңейтумен қатар облыстың Төтенше жағдайлар департаментінің материалдық-техникалық базасы да жаңартылды. Гарнизонға төрт жаңа арнайы техника берілді. Олардың қатарында жол талғамайтын өрт сөндіру көліктері мен жедел-құтқару машиналары бар.

Жаңа көліктер күрделі жағдайларда оқиға орнына жедел жетуге, төтенше жағдайдың салдарын барынша жылдам жоюға және адамдарды құтқару жұмыстарын жүргізуге арналған. Арнайы техниканың кілттерін құтқарушыларға ҚР Төтенше жағдайлар министрі Шыңғыс Әрінов табыстады.

Салтанатты шара барысында азаматтық қорғау саласының дамуына үлес қосқан азаматтар да марапатталды. Оларға Шығыс Қазақстан облысы әкімінің Алғыс хаттары берілді.

Өңірде жаңа құтқару нысандарының салынуы, әсіресе жазғы маусымда маңызды. Күн жылынған кезде Ертіс өзені мен Бұқтырма су қоймасының жағалауына келетін тұрғындар мен туристер саны көбейеді. Бұл өз кезегінде су айдындарын тұрақты бақылап, кез келген төтенше жағдайға дайын тұратын құтқару бөлімшелерінің маңызын арттырады.

Бір күнде екі жаңа нысанның іске қосылып, Төтенше жағдайлар департаментінің арнайы техникамен толықтырылуы Шығыс Қазақстандағы азаматтық қорғау жүйесінің мүмкіндігін кеңейтіп отыр. Жаңа станциялар құтқарушылардың жеделдігін арттырып қана қоймай, өңірдің танымал демалыс орындарындағы қауіпсіздікті қамтамасыз етуге қызмет етпек.