Шығыс Қазақстан облысында 2,2 млрд теңгеге жаңа қонақүй ашылды

Шығыс Қазақстан облысында аймақ басшысы Нұрымбет Сақтағановтың қатысуымен «Monotel» атты жаңа заманауи қонақүй кешені ашылды. Жеке инвестор Мейрамбек Садықов жүзеге асырған бұл жобаның жалпы құны 2,2 млрд теңгені құрады. Бұл туралы облыс әкімдігінің баспасөз қызметі хабарлады.

Жаңа қонақүйде бір мезетте 92 адамға дейін қабылдай алатын 46 нөмір қарастырылған. Нөмірлер қоры стандартты бөлмелерден бастап, президенттік люкс нөмірлерге дейін қамтиды. Сондай-ақ кешен аумағында 200 орындық мейрамхана жұмыс істейді. Жобаны іске асыру нәтижесінде өңірде 50 тұрақты жұмыс орны ашылды.

Нысанның ашылу салтанатында облыс әкімі Нұрымбет Сақтағанов жобаның маңыздылығына тоқталды.

«Кәсіпкерлік, инвестициялар және туризм өзара тығыз байланысты. Бір бағыт екіншісінсіз дами алмайды. Жаңа орналастыру нысандарының ашылуы – өңірдің инвестициялық тартымдылығының көрсеткіші әрі шағын және орта бизнесті дамытуға қосымша серпін береді», — деді аймақ басшысы.

Бұл жоба облыстың туристік инфрақұрылымын жақсартуға және қызмет көрсету сапасын халықаралық деңгейге көтеруге бағытталған кезекті қадам болып табылады. Мамандардың пікірінше, мұндай нысандардың көбеюі аймаққа келетін шетелдік және отандық туристер ағынын арттыруға септігін тигізбек.