Шопандар 55 жастан бастап әлеуметтік төлем ала алады

Қазақстан Үкіметі Мал шаруашылығын дамытудың 2026–2030 жылдарға арналған кешенді жоспарының жобасын мақұлдады, деп хабарлады Премьер-министрдің баспасөз қызметі. Құжатта жеңілдікті несиелендіру, мал басын көбейту, ет өндірісін арттыру және экспортты кеңейту шаралары көзделген.

Кешенді жоспарға сәйкес, 2030 жылға қарай мынадай нәтижелер күтіледі:

• Ірі қара мал басын 7,9 млн-нан 12 млн-ға дейін көбейту;
• Ұсақ мүйізді мал басын 20,2 млн-нан 28 млн-ға дейін арттыру;
• Ет өндірісін 1,2 млн-нан 1,8 млн тоннаға дейін жеткізу;
• Ет экспортын екі есеге жуық – 82 мыңнан 165 мың тоннаға дейін ұлғайту.

Ауыл шаруашылығы министрі Айдарбек Сапаров аталған көрсеткіштерге қол жеткізу мақсатында бірқатар қаржылай қолдау шараларының қарастырылғанын мәлімдеді. Атап айтқанда, малдың барлық түрін сатып алуға жылдық қажеттілігі 300 млрд теңге болатын 6%-дық жеңілдікті несие бағдарламасы іске қосылады. Сонымен қатар, жайылымдық мал шаруашылығы мен инфрақұрылымды дамыту үшін 50 млрд теңге көлемінде 6%-дық бірыңғай жеңілдікті несие берілсе, жемшөп дайындайтын техника мен жабдықтарды сатып алуға тағы 50 млрд теңге 5%-дық мөлшерлемемен бағытталады. Сондай-ақ, мал шаруашылығындағы айналым қаражатын толықтыру үшін жалпы сомасы 225 млрд теңгені құрайтын 5%-дық несиелер беру көзделген.

Қаржыға қолжетімділікті арттыру үшін «Даму» қоры арқылы қарыздарды кепілдендіру тетігі қарастырылған. Құжатта сонымен қатар кадр мәселесі мен еңбек жағдайын жақсарту шаралары да жазылған. Олардың ішінде бақташылар мен шопандардың 55 жастан бастап арнайы әлеуметтік төлемдер алуға құқығы бар. Осыған ұқсас қолдау шарасы 2023 жылы шахтерлерге қатысты қабылданған болатын. Қазірше шопандарға төленетін әлеуметтік көмек механизмінің егжей-тегжейі хабарланған жоқ.

Сонымен қатар билік экспортқа шығудың міндетті шарты ретінде ветеринариялық қауіпсіздікті күшейтуді көздеп отыр. Бұл ветеринариялық нысандарды жаңғырту мен сауда орындарында күнделікті бақылауды енгізуді қамтиды. Параллельді түрде жануарлар иелерінің жауапкершілігін арттыру мәселесі пысықталуда.

Олжас Бектенов бұл жоспарды іске асыру ішкі нарықты отандық өніммен қамтамасыз етуге және әлеуметтік маңызы бар тауарлар бағасының тұрақтылығын сақтауға тиіс екенін атап өтті. Сондай-ақ ол қайта өңдеу саласын дамытуды және қосылған құны жоғары өнім шығаруды арттыруды тапсырды.