ШҚО: Катонқарағай ауданында ауқымды экологиялық сенбілік өтті

Республикалық «Таза Қазақстан» экологиялық бастамасы аясында Шығыс Қазақстан облысының Катонқарағай ауданында ауқымды тазалық шарасы өтті. Туған өлке табиғатын аялауға бағытталған бұл акцияға жергілікті тұрғындар, еріктілер тобы және мемлекеттік орган өкілдері біркісідей жұмылды.

Шараның ашылу салтанатында сөз алған аудан әкімі аппаратының басшысы Айтас Нұрқас жиналғандарды маңызды бастаманың басталуымен құттықтады. Ол өз сөзінде қоршаған ортаны таза ұстау – әрбір азаматтың перзенттік парзы екенін атап өтіп, табиғат жанашырларына азаматтық белсенділігі үшін ризашылығын білдірді.

Сенбілік барысында қатысушылар елді мекен көшелерін, саябақтар мен қоғамдық демалыс орындарын, бұлақ көздері мен тасжол бойларын тұрмыстық қалдықтардан арылтты.

Ұйымдастырушылар ұсынған дерекке сүйенсек, экологиялық шараға 300-ден астам адам қатысып, 3 бірлік арнайы техника жұмылдырылған. Бірлескен жұмыстың нәтижесінде аудан аумағынан 3 тоннадан астам қоқыс сұрыпталып, арнайы полигонға шығарылды.

Бұл бастаманың негізгі міндеті – халық арасында экологиялық мәдениетті қалыптастыру, туған табиғатқа деген жауапкершілікті арттыру және ауылдардың санитарлық жағдайын жақсарту болып табылады.