ШҚО-дағы екі жаңа әуежай құрылысы аяқталуға жақын: Аймақ басшысы Премьер-министрге есеп берді

Шығыс Қазақстан облысында авиациялық инфрақұрылымды дамыту жұмыстары жоғары қарқынмен жүргізілуде. ҚР Премьер-министрі Олжас Бектеновтің төрағалығымен өткен Үкімет отырысында аймақтағы ірі көлік-логистикалық жобалардың барысы талқыланды. Облыс басшылығы Мемлекет басшысының тапсырмасы аясында Зайсан және Катонқарағай аудандарында салынып жатқан жаңа әуежайлардың құрылысы ағымдағы жылы толық аяқталатынын мәлімдеді.

Бұл нысандар өңірдің көліктік қолжетімділігін арттырып қана қоймай, туризм мен инвестициялық әлеуеттің артуына қуатты серпін бермек. Жаңа әуежайлардың операторы болып «Өскемен әуежайы» АҚ белгіленді.

Бүгінгі таңда Зайсан ауданындағы әуежайдың дайындығы 76%-ға жетті. Мұнда ұшу-қону жолағы, перрон және бағыттаушы жол құрылысы толық аяқталған. Қазіргі уақытта терминал ғимаратын тұрғызу, инженерлік инфрақұрылымды тарту және автожолдар салу жұмыстары жүріп жатыр. Нысанды пайдалануға беру ағымдағы жылдың шілде айына жоспарланған.

Ал Катонқарағай ауданындағы әуежайдың дайындық деңгейі 55%-ды құрайды. Қазіргі уақытта жасанды ұшу-қону жолағының екінші асфальт-бетон қабаты төселуде. Сонымен қатар инженерлік желілерді тарту мен ғимараттар құрылысы қатар жүргізіліп жатыр. Нысанды қыркүйек айында аяқтап, сертификаттаудан өткізу көзделуде. Жоба аясында әр әуежайда 57 тұрақты жұмыс орны ашылады.

ҚР Премьер-министрі Олжас Бектенов Президент тапсырмасымен салынып жатқан бұл нысандардың ешқандай кешіктірусіз, бекітілген кестеге сай қолданысқа берілуін және мамандардың сапалы даярлануын салалық министрлік пен аймақ басшылығына қатаң тапқырды.

ШҚО әкімдігі қазірдің өзінде жаңа авиамаршруттарды қалыптастыру жұмыстарын бастап кетті. Алғашқы кезеңде Зайсан мен Катонқарағайдан Өскемен, Астана және Алматы қалаларына ішкі рейстер ашылады, ал болашақта халықаралық бағыттарды іске қосу жоспарлануда. Сонымен қатар облыс билігі Үкімет алдында Өскеменнен Ақтау, Атырау, Ақтөбе және Түркістан қалаларына субсидияланатын тікелей авиарейстер ашу мәселесін көтерді.

«Жүзеге асырылып жатқан жобалар өңірдегі жолаушылар ағынын жылына 100 мың адамға арттыруға мүмкіндік береді. Егер қазіргі көрсеткіш 700 мың жолаушыны құраса, жаңа инфрақұрылым іске қосылғаннан кейін бұл сан 800 мыңға жетеді», - деп атап өтті ШҚО әкімі Нурымбет Сақтағанов.

Жиында Өскемен әуежайына енгізілген озық цифрлық шешімдер де ерекше аталды. Бүгінде мұнда жолаушыларды автоматты түрде тіркеу, багажды рәсімдеу, цифрлық ақпараттандыру, бейнебақылау және қолжетімділікті бақылау жүйелері, сондай-ақ электронды құжат айналымы толықтай іске қосылған.