ШҚО-да «Оқитын ұлт» бастамасын қолдауға бағытталған ерекше мәдени фестиваль ұйымдастырылуда

11 қыркүйек күні Өскемен қаласындағы тұрғындардың сүйікті демалыс орны - Арбатта «Shygys Book Fest – 2026» атты ауқымды кітап фестивалі ұйымдастырылады, деп хабарлайды Шығыс Қазақстан облысының әкімдігі баспасөз қызметі. Мәдени шараға ШҚО мәдениет басқармасы мен А.С. Пушкин атындағы Шығыс Қазақстан облыстық кітапханасы мурындық болып отыр. Мерекелік жиынның негізгі мұраты - Мемлекет басшысы Қасым-Жомарт Тоқаевтың «Оқитын ұлт» тұжырымдамасын кеңінен дәріптеп, жергілікті жазушылар мен жас таланттардың шығармашылығын көпшілікке таныстыру, сондай-ақ отандық баспагерлерге қолдау білдіру.

Аталмыш фестиваль әдебиет сүйер қауым үшін тек кітап көрмесін тамашалап қана қоймай, танымал қаламгерлермен жүзбе-жүз кездесіп, білім деңгейін сынауға және жаңа басылымдармен егжей-тегжейлі танысуға тамаша мүмкіндік береді. Мәдени жиын аясында Есенбек Айтқазыұлы Мейірбаевтың демеушілігімен жарыққа шыққан «Қабанбай» туындысының салтанатты тұсаукесері жоспарланған.

Мәдени бағдарлама мұнымен шектелмейді. «SAMGA» даму орталығының жетекшісі Әлия Көңілханның бастамасымен ұлы Абай Құнанбайұлының шығармалары негізінде дайындалған «Болыс болдым, мінеки...» атты театрландырылған қойылым көрермен назарына ұсынылады. Сонымен қатар, режиссер әрі актер Ертай Хасеновтің басшылығындағы «Шабыт» жастар театры қала тұрғындарына ерекше көңіл-күй сыйламақ. Шара аясында жергілікті кітап дүкендері мен баспалар арнайы сату жәрмеңкесін ұйымдастырады.

Фестивальге келушілерді өте бай әрі қызықты бағдарлама күтіп тұр:

• Автограф-сессиялар мен кездесулер: Танымал тұлғалармен және жазушылармен сұхбаттасып, авторлардың өз қолынан қолтаңбасы бар кітаптарды сатып алу мүмкіндігі.

• Танымдық және интерактивті аймақтар: Интеллектуалды сайыстар, жүлделі викториналар, шеберлік сабақтары, арт-кеңістіктер және балаларға арналған интерактивті ойын алаңдары.

• Кітап көрмелері мен буккроссинг: Тақырыптық бұрыштар, кітап алмасу алаңы және облыстық әрі аудандық кітапханалардың арнайы әзірлеген бірегей экспозициялары.

«Shygys Book Fest – 2026» фестивалі - заманауи үлгідегі кітап мәдениетін қалыптастырып, оқырман мен автор арасындағы байланысты нығайтатын бірегей жоба. Шараның басты философиясы — білімді, зияткер әрі ойлы қоғам қалыптастыруға үлес қосу. Себебі кітап оқитын ұрпақ — ел болашағының берік діңгегі.

Мерекелік іс-шара 11 қыркүйек күні сағат 14:00-ден 19:00-ге дейін Арбат аумағында өтеді.