ШҚО-да KAZ Minerals шахтасында жұмысшы қаза тапты

Шығыс Қазақстан облысындағы Артемьев шахтасында жұмысшы қаза болды, деп хабарлады KAZ Minerals компаниясының баспасөз қызметі. Оқиға 9 мамыр күні «Шығыстүстімет» кәсіпорнына қарасты кен орнында болған.

Алдын ала мәлімет бойынша, шаң және желдету қызметінің механигі жөндеу жұмыстарын жүргізу кезінде шамамен 9 метр биіктіктен құлап кеткен. Алған жарақаттары салдарынан ол оқиға орнында мерт болды. Қазіргі уақытта жағдайдың жай-жапсарын анықтау үшін арнайы комиссия құрылып, тергеу амалдары жүріп жатыр. Компания марқұмның отбасына қажетті көмек көрсетілетінін мәлімдеді.

Айта кетейік, бұл KAZ Minerals нысандарында соңғы айда болған екінші қайғылы оқиға. Биыл 27 сәуірде Орлов шахтасында тау массасы опырылып, бір жұмысшы қаза тауып, екіншісі жарақат алған болатын. Аталған факті бойынша полиция қылмыстық іс қозғады.

KAZ Minerals тобы Шығыс Қазақстан, Павлодар және Абай облыстарындағы бірнеше ірі кен орындарын иеленеді. Компанияның негізгі акционері – байлығы 5,9 миллиард долларға бағаланған миллиардер Владимир Ким.