ШҚО-да ғылымға бөлінетін қаржы үш есеге ұлғайды

Үкімет отырысында елдегі ғылым саласын дамыту мәселелері қаралды. Жиын барысында Шығыс Қазақстан облысының әкімі Нұрымбет Сақтағанов өңірде ғылыми зерттеулерді қолдау бағытында атқарылып жатқан жұмыстар туралы баяндады.

Әкімнің айтуынша, соңғы екі жылда ШҚО-да ғылыми жобаларды қаржыландыру көлемі үш есеге артқан. Қазіргі таңда облыста мемлекеттік, халықаралық және жеке тапсырыс аясында 250-ден астам ғылыми жоба жүзеге асырылып жатыр.

Өңірде ғылыми зерттеулер негізінен металлургия, энергетика, көлік саласы, цифрлық шешімдер, экология, агроөнеркәсіптік кешен мен медицина бағыттарына шоғырланған. Сонымен қатар бизнес өкілдерінің қатысуымен зертханалар, тәжірибелік алаңдар мен инженерлік шеберханаларды қамтитын ғылыми-өндірістік инфрақұрылым дамып келеді.

Медициналық технологиялар саласында да нақты нәтижелер бар. Д.Серікбаев атындағы Шығыс Қазақстан университетінде травматология және ортопедияға арналған медициналық бұйымдар әзірленуде. Имплантаттардың екі түрі клиникалық зерттеулерден толық өтсе, төртеуі сынақ кезеңінде, ал тағы 14 әзірлеме Астанадағы Батпенов атындағы Ұлттық травматология және ортопедия орталығында клиникалық сынақтан өтуге дайындалуда.

Аймақта қауіпсіздікке бағытталған ғылыми жобалар да енгізіліп жатыр. Соның бірі – көшкін қаупін автоматты түрде бақылау жүйесі. Бұл жүйе облыстың үш аумағында іске қосылып, тұрғындар мен инфрақұрылым нысандарының қауіпсіздігін арттыруға мүмкіндік берді.

Сонымен қатар Шығыс Қазақстанда Сирек металдарды зерттеу орталығын құру жұмыстары басталған. Бұл бастама сирек және стратегиялық маңызы бар металдар нарығындағы жаһандық бәсекелестік жағдайында өңірдің ғылыми және өндірістік әлеуетін күшейтуге бағытталған. Университеттің қолданыстағы зертханалық базасы технологиялық тізбектің шамамен 60 пайызын қамтып, жобаны жүзеге асыру мерзімі мен шығындарын қысқартуға мүмкіндік беріп отыр.

Қазіргі уақытта Шығыс Қазақстан облысының 2030 жылға дейінгі даму стратегиясы келісу сатысында. Құжатта өңірде сирек жер элементтері мен сирек металдарды толық өңдеу циклымен өндіру жобаларын іске қосу жоспарланған.