ШҚО-да бір күнде екі бірдей әлемдік рекорд жаңарды

Халықаралық отбасы күні аясында Шығыс Қазақстан облысында «Ғасырлық дәстүрлер» атты халықаралық фестиваль өтті. Ауқымды мәдени шара барысында ұлттық сәндік-қолданбалы өнер саласы бойынша Global Best of Records (GBR) халықаралық ұйымының екі әлемдік рекорды ресми түрде тіркелді.

Фестивальдің басты оқиғасы – қазақтың дәстүрлі құрақ құрау өнеріне негізделген «Аламан құрақ – 2026» жобасының Global Best of Records халықаралық рекордтар кітабына енуі болды. Бұл бірегей жоба әлемдік рекорд мәртебесіне ие болып, халықаралық деңгейде ресми түрде мойындалды.

Рекордтық жоба аясында көпшілік назарына ені 60 сантиметр болатын, ұлттық нақышта тігілген «Жылқы» сәндік жастықтары ұсынылды. Бұйымдарда қазақ мәдениетіндегі еркіндік, күш пен тектіліктің символы саналатын жылқы бейнесі бедерленген. Шеберлер жалпы саны 788 жастық дайындап, бұл көрсеткіш те халықаралық рекордтар кітабына жеке аталым ретінде енгізілді.

Сонымен қатар, өздерінің сәндік бұйымдарын таныстырған тігіншілер мен қолөнер шеберлерінің салтанатты ұлттық шеруі де дербес әлемдік рекорд ретінде тіркелді.

Шығыс Қазақстан облысының әкімі Нұрымбет Сақтағанов халықтық қолөнерді дамыту мен мәдени мұраны сақтау өңірлік саясаттың маңызды бағыттарының бірі екенін атап өтті.

«Біздің өңір ежелден бай мәдени мұрасымен, этностардың алуан түрлілігімен және салт-дәстүрге деген құрметімен ерекшеленеді. Бүгінгі таңда біз қолөнершілерді қолдауға, креативті индустрияларды дамытуға және ұлттық өнерді жас ұрпаққа насихаттауға ерекше көңіл бөліп отырмыз», — деді аймақ басшысы.

Іс-шара қорытындысы бойынша фестиваль аясында дайындалған барлық сәндік жастықтар «Үміт» балалар үйінің тәрбиеленушілеріне қайырымдылық көмек ретінде табыс етілді.

Ұйымдастырушылардың мәліметінше, аталған жоба ұлттық құндылықтарды дәріптеумен қатар, қазақтың сәндік-қолданбалы өнерін халықаралық деңгейде танытуды мақсат етеді. Фестивальдің жетістіктері Шығыс Қазақстан облысының жоғары мәдени әлеуетін айғақтап, отандық қолөнердің әлемдік деңгейдегі беделін нығайтуға септігін тигізді.