ШҚО-да әткеншектен құлап көз жұмған 8 жасар баланың ісі: тәрбиешілер рақымшылықпен босатылды

Өскемен қаласында саябақтағы әткеншектен құлап, ауыр жарақаттан көз жұмған сегіз жасар баланың өліміне байланысты іс бойынша сот үкімі шықты. Бұл туралы Шығыс Қазақстан облыстық сотының баспасөз қызметі хабарлады.

Қайғылы оқиға 2024 жылғы 11 шілдеде қалалық «Сәулетай» саябағында болған. Роман Цуранов есімді қала тұрғыны екі баласын жазғы күндізгі лагерьге алып келеді. Тәрбиешілер оларды ата-анамен тиісті келісімшарт жасаспай-ақ топқа қабылдайды. Сол күні тәрбиешілер 6–10 жас аралығындағы 27 баланы серуенге алып шығады.

Сот дерегінше, бала тиісті қараусыз қалып, мүмкіндігі шектеулі балаларға арналған жарамсыз әткеншекке мініп, құлап кетеді. Ауыр жарақат алған бала шұғыл түрде ауруханаға жеткізіледі. Дәрігерлердің барлық әрекетіне қарамастан, ол есін жимастан 2024 жылғы 23 шілдеде көз жұмады.

Қайтыс болған баланың туыстары тәрбиешілерді жауапкершілікке тартуды, сондай-ақ жеке меншік балабақшалар мен ойын алаңдарының қауіпсіздігіне тексеріс жүргізуді талап етті.

Сотта тәрбиешілер кінәсін мойындаған жоқ, оқиғаны кездейсоқ жағдай деп бағалауды сұрады. Алайда сот оларды Қылмыстық кодекстің 141-бабы бойынша («Балалардың өмірі мен денсаулығының қауіпсіздігін қамтамасыз ету жөніндегі міндеттерге немқұрайлы қарау салдарынан абайсызда баланың өліміне әкеп соққан іс-әрекет») бойынша кінәлі деп танып, әрқайсысына екі жыл бас бостандығынан айыру жазасын тағайындады.

Сонымен қатар сот тәрбиешілердің кәмелетке толмаған балаларының барын ескере отырып, бұл жайтты жеңілдететін мән-жай ретінде таныды. Ал Қазақстан Конституциясының 30 жылдығына арналған рақымшылық заңы негізінде екі тәрбиеші де негізгі жазадан босатылды.

Үкім әлі заңды күшіне енген жоқ.

Бұған дейін тәрбиеші Анастасия Давыдова оқиға кезінде әріптесімен балаларды бақылауға тырысқандарын, бірақ бәріне бірдей үлгеру мүмкін болмағанын айтып ақталған еді.

«Барлығы әп-сәтте жан-жаққа тарап кетті. Мен дәріханаға екі минутқа кіріп шыққанша, әріптесім де аз уақытқа кетті, сол сәтте бала әткеншектен құлап түсті. Сол кезде алаңда бір тәрбиеші болған, ол жарақат алған балаға көмек көрсетіп жатты. Біз бәрін жеке қадағалай алмаймыз ғой, әр баланы қолынан ұстап жүру мүмкін емес», – деген болатын Давыдова.

Аталған оқиғаға қатысты өңірлік бала құқықтары жөніндегі уәкіл де ата-аналар жағын қолдағанын мәлімдеген.