ШҚО әкімінің бірінші орынбасары алаяқтық пен пара алу ісі бойынша айыпталып жатыр

Шығыс Қазақстан облысы әкімінің бірінші орынбасары Жақсылық Омарға қатысты қылмыстық іс Өскемен қаласының мамандандырылған ауданаралық қылмыстық сотына түсті. Бұл туралы мәліметтер сот кабинеті базасында жарияланған.

Оған Қылмыстық кодекстің 190-бабы 3-бөлігі (ірі көлемде жасалған алаяқтық) және 366-бабы 3-бөлігі (ірі көлемде пара алу) бойынша айып тағылған.

Соттың негізгі қарауы 19 наурызға белгіленген. Процесс ашық режимде өтеді.

Сондай-ақ сот қаулысында күдіктіге қатысты бұлтартпау шарасы өзгеріссіз қалдырылғаны көрсетілген. Яғни, ол іс қаралғанға дейін қамауда болады.

Еске салайық, 18 ақпанда Ұлттық қауіпсіздік комитеті Жақсылық Омарға қатысты тергеу жүргізіліп жатқанын растаған. Ол Шығыс Қазақстан облысы әкімінің бірінші орынбасары қызметіне 2025 жылдың сәуірінде тағайындалған. Бұған дейін әкім кеңесшісі болған, ал 2018–2024 жылдары Өскемен қаласының әкімі қызметін атқарған.