ШҚО әкімі: Әділетті, қауіпсіз әрі таза Қазақстанды құру – баршамызға ортақ міндет

2 ақпан күні Шығыс Қазақстан облысы әкімдігінде Конституциялық реформаларға арналған жиын өтті. Іс-шараға облыс әкімі Нұрымбет Сақтағанов қатысты.

Жиын барысында аймақ басшысы Мемлекет басшысы Қасым-Жомарт Тоқаевтың жарлығымен Конституциялық реформа жөніндегі комиссия құрылғанын, оның құрамына 130 адам енгенін атап өтті. Комиссия мүшелері қатарында ШҚО-дан облыстық мәслихат төрағасы Денис Рыпаков пен өңірлік қоғамдық кеңес төрағасы Аяужан Әшімова бар.

Нұрымбет Сақтағановтың айтуынша, Ата Заңға өзгерістер енгізу – мемлекеттің құқықтық негізіне және қоғамдық келісімге тікелей әсер ететін маңызды қадам. Осыған байланысты талқылау жабық форматта емес, ашық әрі жария түрде өтті.

Жиында жаңа Конституция жобасы қоғам сұранысы мен заман талаптарына сай әзірленгені айтылды. Құжатта Қазақстанның демократиялық, зайырлы, құқықтық және әлеуметтік мемлекет екені нақты бекітілген. Ұсынылып отырған жоба Кіріспеден, 11 бөлімнен және 95 баптан тұрады.

Облыстық мәслихат төрағасы Денис Рыпаков жаңа Конституция жобасындағы бірқатар баптарға тоқталды. Ал өңірлік қоғамдық кеңес төрағасы Аяужан Әшімова Конституциялық комиссия қызметінің ашықтығын арттыру мақсатында қабылданған шаралар туралы баяндады. Оның айтуынша, комиссия барлық ұсыныстарды ескере отырып, Конституцияның 77 бабына түзету енгізген. Бұл Негізгі заң мәтінінің 84 пайызына тең.

Жиын соңында облыс әкімі әділетті, қауіпсіз әрі таза Қазақстанды құру – баршаға ортақ міндет екенін атап өтті.