Шетелге соғысқа барсаңыз, азаматтықтан айырыласыз: ІІМ ескерту жасады

Ішкі істер министрлігі Қазақстан азаматтарын шетелдегі қарулы қақтығыстарға қатысудан бас тартуға шақырып, мұндай әрекеттердің заңмен қатаң жазаланатынын ескертті.

«Соңғы уақытта әлеуметтік желілерде қомақты қаржылай сыйақы ұсыну арқылы азаматтарға шет мемлекеттердің әскери күштерімен келісімшартқа отыру ұсынылатын жарнамалар мен бейнематериалдар таралып жатыр», – делінген министрлік хабарламасында.

Министрлік өкілдері бұл әрекет заңсыз екенін және ҚР Қылмыстық кодексінің 172-бабы бойынша шетелдегі қарулы қақтығыстарға заңсыз қатысу үшін 5 жылдан 9 жылға дейін бас бостандығынан айыру жазасы қарастырылатынын еске салды.

Ал Қылмыстық кодекстің 170-бабы бойынша жалдамалылық (яғни, қарулы жанжалға ақылы түрде қатысу) үшін 7 жылдан бастап өмір бойына дейін бас бостандығынан айыру, сонымен қатар азаматтықтан айыру және мүлікті тәркілеу жазасы көзделген.

ІІМ барлық азаматтарды осындай ұсыныстардан сақ болуға және заңсыз әрекеттерге бармауға шақырды.