Шетелдіктерден 200 мың теңге бопсалаған жол сақшылары жұмыстан шығарылды

Беларусьтік автоблогерден және басқа да шетелдік саяхатшылардан «техникалық байқаудан өтпедіңдер» деген желеумен 200 мың теңге талап еткен жол полицейлері жұмыстан шығарылды. Бұл туралы Ішкі істер министрінің орынбасары Игорь Лепёха мәлімдеді.

Бұған дейін әлеуметтік желілерде Беларусьтен келген автоблогер Александр Гулько мен өзге азаматтарды қазақстандық трассада жол сақшылары тоқтатып, жергілікті техникалық байқаудан өтпегені үшін 200 мың теңге сұрағаны туралы видео тараған болатын. Полицейлер бұл соманы төлесе, шекараға дейін ешкім мазаламайтынын айтып, "ұсыныс" жасаған.

— Қазір бұл факт бойынша тексеріс жүріп жатыр. Қылмыстық іс қозғалды. Аталған қызметкерлер жұмыстан шығарылды, — деді Игорь Лепёха мәжіліс кулуарында.