Шетел азаматтары адам ұрлағаны үшін сотталды

Астанада адам ұрлау және өз білгенінше әрекет ету ісі бойынша Орталық Азия елдерінің бірінің алты азаматына сот үкімі шықты. Бұл туралы Бас прокуратураның баспасөз қызметі хабарлады.

Ведомство мәліметінше, Астана қаласының қылмыстық істер жөніндегі ауданаралық соты бес айыпталушыны алдын ала сөз байласу арқылы пайдакүнемдік мақсатпен адам ұрлағаны үшін сегіз жылға бас бостандығынан айырған. Ал қылмысқа көмектескен тағы бір азамат адам ұрлауға жәрдемдескені және өз білгенінше әрекет еткені үшін жеті жыл алты ай мерзімге сотталған.

Тергеу деректеріне сәйкес, 2024 жылғы 9 желтоқсанда топ мүшелерінің бірі жәбірленушіден орындалмаған қызмет үшін ақша талап етіп, күш қолданған. Соның салдарынан жәбірленуші оған 80 мың теңге аударуға мәжбүр болған.

Кейін күдіктілер алдын ала келісіп, жәбірленушіні Астана аумағында күш қолданып алып кеткен. Қылмыс пайдакүнемдік мақсатпен жасалғаны анықталған.

Бас прокуратура сот талқылауы барысында мемлекеттік айыптаушы сотталушылардың кінәсін дәлелдейтін жеткілікті айғақтар ұсынғанын мәлімдеді.