Шерзаттың ісі бойынша тергеу жыл соңына дейін аяқталады

Шерзат Полаттың ісі бойынша тергеудің қай кезеңде екенін ішкі істер министрінің орынбасары Санжар Әділов мәлімдеді.

«Жыл соңына дейін барлық сараптаманы аламыз және тергеу әрекеттерін толықтай аяқтаймыз. Бұл қылмыстық іс бойынша 11 айыпталушы қамауда отыр. Оларға түпкілікті айыптау прокурордың келісімімен ұсынылады. Кейін қылмыстық істің материалдары процеске қатысушыларға таныстырылады», — деді Әділов.

Сондай-ақ Әділов Шерзаттың ағасы Нұрғанат Ғайыпбаевтың (алдын ала мәлімет бойынша) өз-өзіне қол жұмсауына байланысты пікір білдірді.

Нұрғанат Ғайыпбаев маңызды куәгер болған және сотта айғақ беруі тиіс еді.

«Өзін-өзі өлтіру фактісі бойынша қылмыстық іс қозғалды. Сот-медициналық сараптаманың алдын ала нәтижелері жарияланды. Зорлық-зомбылық белгілері табылған жоқ. Қазіргі уақытта тергеу жүріп жатыр. Заңға сәйкес, тергеу екі ай ішінде аяқталуы керек, қажет болған жағдайда мерзім ұзартылуы мүмкін», — деді Әділов.

ІІМ Ғайыпбаевтың өлімі бойынша тергеу кезінде туыстары ұсынған нұсқаларды қоса алғанда, барлық болжамдарды қарастыратынын айтты.