Шерзаттың әкесінің үстінен қылмыстық іс қозғалды

Адвокат Асқар Қаймақов Талғарда қайтыс болған Шерзат Полаттың әкесі Қаржаубай Нұрымовқа қатысты сотқа дейінгі тергеу басталғанын хабарлады.

«Бүгін Қаржаубай Нұрымовқа қатысты полиция Қылмыстық кодекстің 202-бабы (бөтеннің мүлкін қасақана жою немесе бүлдіру) бойынша сотқа дейінгі тергеу бастады», — деп жазды адвокат Facebook парақшасында.

Сондай-ақ адвокат Нұрымовтың өкілдері оны ұстауды  сұрамағанын, бұл туралы полиция мәлімдегендей емес екенін айтты. Нұрымовқа 15 тәулікке қамау тағайындаған сот шешімін заңсыз деп атап, сотта өрескел қателіктер болғанын жеткізді, алайда нақты қандай қателіктер туралы айтпады.

Оның айтуынша, Нұрымовтың туыстары қайтыс болған Нұрқанат Ғайыпбаевтың жеке хаттарын жариялауға келісім бермеген.

10 желтоқсанда Шерзат Полаттың ағасы Нұрқанат Ғайыпбаевты жерлеу рәсімі өтті. Ғайыпбаевтың денесі Талғардың шетінде табылған болатын. Полицияның мәлімдеуінше, қазіргі тергеу барысында қылмыстық сипаттағы белгілер анықталмаған.

Сол күні, жерлеу рәсімінен кейін, Қаржаубай Нұрымовты полиция ұстады. 11 желтоқсанға қараған түні сот оған «қоғамдық тәртіпті бұзды» деген айыппен (ӘҚБтК 434-бабы) 15 тәулікке қамау жазасын тағайындады. Полиция мәлімдемесінде Нұрымовтың бейпіл сөздер айтып, қоғамға тиісіп, полиция қызметкеріне пышақпен қоқан-лоқы көрсеткені айтылды.