Шерзат ісі: Қылмыстық іс бойынша үкім шығатын күн белгіленді

Талғардағы жасөспірім Шерзат Полаттың өліміне байланысты қылмыстық іс бойынша сот процесі аяқталды. Үкім 5 маусым күні сағат 16:00-де жарияланбақ.

Сот алдында барлығы 9 адам жауап беріп жатыр, олардың бірі – кәмелет жасына толмаған. Мемлекеттік айыптаушы басты айыпталушы Абзал Шынасылға 23 жылға бас бостандығынан айыру жазасын сұрады. Қалған сотталушыларға 1 жыл 6 айдан 20 жылға дейін жаза тағайындау ұсынылды.

Сот отырыстарында көптеген жайттар ашылып, тергеу барысындағы келіспеушіліктер де қозғалды. Абзал Шынасыл өзіне тағылған айыпты тергеу кезінде алдын ала келісіммен мойнына алғанын айтты. Ал сараптама Шерзаттың пышақ жарақатынан көз жұмғанын растады.

2024 жылдың 4 қазанында болған бұл қанды оқиға қоғамда үлкен резонанс тудырған еді. Қазір барша жұрт 5 маусымда шығатын сот үкімін күтуде.