Щучинскідегі жарылыс: Тергеуге жеті министрлік жұмылдырылды

Қазақстан Төтенше жағдайлар министрлігі Щучинск қаласындағы дәмханада болған жарылысқа байланысты ведомствоаралық комиссия құрды. Комиссияны ТЖ министрі Шыңғыс Әрінов басқарады.

Комиссия құрамына жеті министрліктің өкілдері енді: ішкі істер, денсаулық сақтау, еңбек және халықты әлеуметтік қорғау, энергетика, өнеркәсіп және құрылыс, әділет, сауда және интеграция министрліктері, сондай-ақ Ақмола облысының әкімдігі.

– Комиссияға оқиғаның себептерін жан-жақты, толық әрі объективті зерттеп, осындай жағдайлардың алдын алу үшін қажетті ұйымдастырушылық және профилактикалық шаралар әзірлеу тапсырылды, – деп хабарлады ведомствоның баспасөз қызметі.

Еске салайық, бес қабатты тұрғын үйге жапсарлас орналасқан бір қабатты дәмханада газ жарылып, артынша өрт шыққан. Өрт сөндірушілер оқиға орнына бес минут ішінде жеткен. Ғимараттан көлемі 50 литрлік бес газ баллоны мен екі оттегі баллоны шығарылып, қайталама жарылыстың алдын алу мүмкін болған. 10 адам құтқарылды.

Қайғылы оқиға салдарынан 7 адам қаза тауып, 28 адам зардап шекті. Оның ішінде 13 адам ауруханаға жатқызылды.

Зардап шеккендер мен қаза тапқандардың отбасыларына медициналық және психологиялық көмек көрсетіледі. Жерлеу рәсімін ұйымдастыруды жергілікті әкімдік өз мойнына алады.