«Шаңырақ күні»: Елордада «Көңілді старт» отбасылық эстафетасы өтті

Бүгін Астана төрінде Наурызнама онкүндігі аясындағы «Шаңырақ күніне» орай ұйымдастырылған «Көңілді старт – 2026» отбасылық эстафетасы нағыз адреналин мен сезімге толы додаға айналды. Бұл жай ғана спорттық жарыс емес, елордалық жас отбасылардың ауызбіршілігі мен шапшаңдығы сыналған үлкен алаң болды. Астана қаласының Жастар саясаты мәселелері басқармасы ұйымдастырған бұл шарада 40-қа жуық жұп бақ сынап, оның тек 15-і ғана финалдық кезеңге жолдама алды.

Сайысқа 35 жасқа дейінгі ерлі-зайыптылар қатысып, алғашқы кезеңде классикалық тапсырмаларды орындаса, шешуші сәтте ұлттық ойындар арқылы өздерінің ептіліктерін дәлелдеді.

Айтулы байқауда Астана қаласы Жастар саясаты мәселелері басқармасының басшысы Самат Ибраев сөз сөйлеп, бұл шараның жас отбасылардың ынтымағын нығайтатын маңызды қадам екенін атап өтті. Тартысты өткен бәсекенің қорытындысы бойынша, Габи Ахназаров пен Ұлжалғас Топбасы есімді жұп І орын иеленіп, 200 000 теңгелік сертификатты иеленді. 

Күміс жүлде Виктор мен Анастасия Григорьевтарға бұйырып (150 000 теңге), қола жүлдені Сырым мен Анара Муханбетжановалар (100 000 теңге) қанағат тұтты. Сонымен қатар, ерекше қырағылық танытқан 12 қатысушыға 20 000 теңгелік ынталандыру сыйлықтары табысталды. Тіпті, қатысушыларды қолдауға келген жанкүйерлер де назардан тыс қалмай, арнайы номинациялармен марапатталды.

Елорданың қоғам қайраткерлері мен депутаттары куә болған бұл мерекелік дода жастар үшін нағыз бірлік пен достықтың символына айналды.