Шаң жұтпайтын шаһар: "Астана Тазалық" жаңа форматтағы жұмыс үлгісін көрсетті

Астана — күн сайын жаңарып, кеңейіп келе жатқан алып мегаполис. Ал үлкен қаланың басты айнасы — тазалық. Бүгін осы маңызды салада ашықтық пен заманауилықты паш еткен «Астана Тазалық» ЖШС-нің бастамасымен ұйымдастырылған ауқымды баспасөз туры өтті. Шара барысында журналистер, экологтар, қоғам белсенділері мен блогерлер елорданың коммуналдық инфрақұрылымының жүрегімен танысты.

Техника – тазалықтың тірегі

Қатысушыларға қала көшелерін тазартуда қолданылатын заманауи техникалар көрсетілді. Бұл – жай ғана техника емес, GPS-навигациямен жабдықталған, қозғалысы мен әрекеті нақты уақыт режимінде бақыланатын ақылды машиналар.

«Егер көлік маршруттан ауытқыса, тоқтап қалса немесе жүргізуші әрекетсіз отырса – бәрі цифрлық бақылауда», – дейді техникалық бөлім басшысы Дастан Мусабеков.

Яғни, енді қала тазалығы кездейсоқ емес — жүйелі, есепке алынған және ашық процесс.

Жаңа буын мамандар: тазалық саласының болашағы

Баспасөз турының тағы бір маңызды жаңалығы — «Астана Тазалық» пен Кәсіби технологиялар колледжі арасында қол қойылған меморандум. Енді колледж студенттері кәсіпорын базасында ақылы өндірістік тәжірибеден өтіп, нақты ортада машықтана алады.

Осы тұста біз болашақ маман, 3-курс студенті Құдірет Оразалыұлымен сөйлестік.

«Мен бала күнімнен техникаға қызығам. Қала тазалығына үлес қосу – бұл үлкен жүйені басқару деген сөз. Мұнда біз шынайы тәжірибе жинаймыз», – дейді ол.

Құдіреттің көзі жанып тұр — бұл жастардың қала тазалығына қалайша заманауи, кәсіби тұрғыда қарап отырғанының айғағы.

Жатақхана — жұмысшыға жайлы өмір

Жұмысшылар жайлылығы да назардан тыс қалмаған. Жаңа жатақхана биыл пайдалануға беріліп, 35–40 адамға дейінгі жұмысшыны қабылдай алады. Әр бөлмеде 4 адам тұрады. Ең бастысы – медициналық пункт бар. Білікті дәрігерлер жұмысшылардың денсаулығына тұрақты мониторинг жүргізіп, алғашқы көмек көрсетеді.

Қаланың тазалығы әр тұрғынның санасынан басталады

Баспасөз турының басты мақсаты – тек техника таныстыру емес, тазалыққа деген көзқарасты өзгерту. Қаланың санитарлық жағдайы тек коммуналдық қызметке емес, әр тұрғынның экологиялық мәдениетіне байланысты.

«Астана Тазалық» ұйымдастырған бұл ашық әрі мазмұнды шара – экологиялық сана мен әлеуметтік жауапкершілік арасындағы алтын көпірге айналды.

Ердаулет Тампишов, Дінмұхаммед Болат