Шабуылға ұшыраған медицина қызметкерлеріне өтемақы төлеу ұсынылды

Қазақстанда қызмет барысында шабуылға ұшыраған медицина қызметкерлеріне қосымша сақтандыру төлемін беру ұсынылды. Тиісті бұйрық жобасын Денсаулық сақтау министрлігі әзірлеп, «Ашық НҚА» порталында жариялады.

Жобаға сәйкес, медицина қызметкерлерінің кәсіби жауапкершілігін сақтандыру тетігі кеңейтілмек. Оған оқу кезінде дәрігер-интерндер мен резиденттерді де қосу көзделген.

Министрлік жаңа тәртіп медицина қызметкерлерінің әлеуметтік және құқықтық қорғалуын күшейтіп, сонымен бірге пациенттердің құқықтарын қорғау тетіктерін жетілдіруге тиіс деп есептейді.

Құжатта медициналық ұйымдар, дәрігерлер, пациенттер және бірыңғай сақтандыру қоры арасындағы өзара іс-қимыл тәртібін, сондай-ақ сақтандыру төлемдерін беру ережелерін өзгерту ұсынылған.

Жоба 2026 жылғы 16 қыркүйекке дейін қоғамдық талқылауда болады.

Бұған дейін, 2026 жылғы 7 наурыздан бастап Қазақстанда медицина қызметкерлері мен жедел жәрдем жүргізушілеріне қызметтік міндетін атқару кезінде қоқан-лоқы көрсету немесе күш қолданғаны үшін бөлек қылмыстық жауапкершілік енгізілген.

Құқық бұзушылықтың сипаты мен ауырлығына қарай жаза 200 АЕК көлеміндегі айыппұлдан бас бостандығынан айыруға дейін барады. Өмірге немесе денсаулыққа қауіпті күш қолданғаны үшін 5 жылдан 10 жылға дейін, ал ауырлататын жағдайда 7 жылдан 12 жылға дейін бас бостандығынан айыру жазасы көзделген.