Серік Сәпиев және оның орынбасары Дәурен Есімханов қызметтерінен босатылды

Қарағанды облысының дене шынықтыру және спорт басқармасының басшысы Серік Сәпиев пен оның орынбасары Дәурен Есімханов өз еркімен берген арыздары негізінде лауазымдарынан босатылды. Бұл шешім осыған дейін әлеуметтік желілерде тараған шулы бейнежазбадан кейін қабылданып отыр.

Еске сала кетсек, желіде тараған кадрларда Шығыс Қазақстан облысы спорт басқармасының бұрынғы басшысы, еңбек сіңірген жаттықтырушы Дәурен Есімхановқа ұқсайтын ер адамның Серік Сәпиевке соққы жұмсағаны көрінеді. Олимпиада чемпионы бұл оқиғаға қатысты арнайы мәлімдеме жасап, болған жағдайдың жеке немесе тұрмыстық жанжалға жатпайтынын айтқан болатын.

Бастапқыда бұл инцидентті «ерлер арасындағы әңгіме» ретінде бағалап, жағдайды жылы жауып қою әрекеттері де болды. Мәселен, Азия дзюдо одағы президентінің кеңесшісі Айдар Махметов ескі таныстар арасында «ешқандай төбелес болмағанын» алға тартқан. Алайда, қоғамда үлкен резонанс тудырған бұл оқиға соңында Қарағанды облысы спорт басшылығының ауысуына әкеп соқты.

Айта кетейік, жанжалға қатысушы тараптардың екеуі де - кәсіби спорт өкілдері. Дәурен Есімханов бұған дейін ШҚО және Павлодар облыстарында спорт басқармаларын басқарған тәжірибелі мемлекеттік қызметкер.