Сергек енді самокатшыларды да түсіріп, айыппұл сала бастайды

Алматыда «Сергек» бейнебақылау камералары электросамокат пайдаланушыларының жол ережесін бұзу фактілерін автоматты түрде тіркеуге көшеді. Бұл туралы Өңірлік коммуникациялар қызметінде өткен брифингте полиция департаментінің ресми өкілі Салтанат Әзірбек мәлім етті.

Спикердің айтуынша, заңнамаға енгізілген соңғы өзгерістерден кейін электросамокаттар толыққанды көлік құралы болып танылды. Осыған байланысты тәртіп сақшылары кикшерингтік компаниялардың мәліметтер қорын полицияның базасымен және «Сергек» жүйесімен интеграциялау жұмыстарын жүргізіп жатыр. Жаңа тетік іске қосылғаннан кейін құқық бұзушылықтар автоматты түрде анықталып, тиісті шаралар қолданылмақ.

Әзірге ереже бұзушыларды анықтау жұмыстарын патрульдік полиция, участкелік инспекторлар және арнайы самокатты патрульдер қолдан жүзеге асыруда. Жыл басынан бері Алматыда жол қозғалысы ережесін бұзған 18 мыңнан астам самокат жүргізушісі әкімшілік жауапкершілікке тартылған.

Сонымен қатар қала тұрғындары мен қонақтары самокатшылардың заңсыз әрекеттері туралы полицияның арнайы WhatsApp нөміріне хабарлай алады. Сондай-ақ шаһарда микромобильді көлік түрлері мен мопедтерге арналған тұрақтарды біріздендіруді көздейтін жаңа жоба дайындалды.