Қазақстанда курьерлер мен такси жүргізушілеріне ең төменгі сағаттық төлем кепілдігі берілуі мүмкін

Қазақстан Парламенті Сенатының депутаты Бибігүл Жексенбай платформалық жұмыспен қамтылған азаматтардың құқықтық мәртебесін айқындап, олардың әлеуметтік қорғалуын күшейтуді ұсынды. Сенатор бұл бастамасын Glovo, Wolt, Яндекс.Про, InDrive сынды цифрлық сервистер арқылы нәпақасын тауып жүрген жүз мыңдаған қазақстандықтың мүддесімен байланыстырды.

Сарапшылардың мәліметінше, бүгінде елімізде 394 мыңға жуық адам цифрлық платформалар арқылы табыс тауып отыр. Бұл - әрбір 25-ші еңбекке қабілетті азамат платформалық экономикаға тартылған деген сөз. Алайда, қазіргі модель орындаушыларды әлеуметтік тұрғыдан қорғаусыз қалдырып отыр.

Платформа арқылы жұмыс істейтіндерді классикалық жалдамалы жұмысшы мен жай «қосымшаны пайдаланушы» арасындағы заңды мәртебемен бекіту. Орындаушылардың табысы критикалық деңгейден төмендемеуі үшін ең төменгі сағаттық төлем стандартын енгізу.

Аккаунттарды бұғаттау туралы шешімдерді тек жасанды интеллект емес, адамның қатысуымен қайта қарау тетігін жасау. Бұл «адам арбитражы» курьерлер кәсіподақтарының басты талаптарының бірі. Күн сайын жол-көлік оқиғасы қаупіне бас тігетін жүргізушілер мен курьерлерді компания-агрегаторлар есебінен ұжымдық сақтандырумен қамту.

Сенатор сонымен қатар платформалардың жұмыс істеу қағидаларын, соның ішінде тапсырыстардың қалай бөлінетінін ашық көрсетуді және техникалық қателіктерден туындаған негізсіз айыппұлдар мен қарыздарды автоматты түрде жоюды ұсынды.

«Бұл саладағы жүйелі заңнамалық шаралар еңбек нарығының ашықтығын арттырып, платформалық экономиканың тұрақты дамуына жағдай жасайды», — деп түйіндеді Бибігүл Жексенбай.