Сенатта кейбір жүргізушіден айыппұлды 50% жеңілдікпен төлеу мүмкіндігін алып тастауды ұсынды

Сенатор Марат Қожаев жол қозғалысы ережелерін өрескел әрі жүйелі түрде бұзатын жүргізушілерге қолданылатын жаза саясатын қайта қарауды ұсынды. Оның айтуынша, қазіргі ережелер заң бұзушылықтардың қайталануының алдын алуға мүмкіндік бермейді.

"Автоматтандырылған техникалық құралдар арқылы тіркелген құқық бұзушылықтар үшін жүргізушіні қайталанған заң бұзушылықтар бойынша жауапқа тарту мүмкін емес, себебі айыппұл жүргізушінің бұған дейінгі бұзушылықтар тарихын ескермей тағайындалады. Жол қозғалысы ережелерін жүйелі түрде бұзатын жүргізушілерді міндетті түрде қайта емтихан тапсыруға жіберу тәртібі қарастырылмаған. Техникалық бақылау құралдары тек құқық бұзушылық фактісін ғана тіркейді, алайда жүргізушінің даярлық деңгейі мен оның өрескел заң бұзушылықтарға немесе жолдағы қауіпті әрекеттерге бейімділігін бағалай алмайды. Көп жағдайда жол-көлік оқиғалары жүргізушілердің жол ережелерін сақтамауы немесе әдейі елемеуі салдарынан орын алады", – деді сенатор.

Оның айтуынша, бір ғана жүргізушінің бір жылда 143 рет ереже бұзғаны анықталған. Ол 3 миллион теңгеден астам айыппұл төлегенімен, жүргізуші куәлігінен айырылмаған.

"Қымбат маркалы автокөліктер мен сұранысы жоғары мемлекеттік нөмірлерге қарағанда, әдетте, бұл ережені елемейтін, жол қозғалысы қауіпсіздігін қасақана бұзып, қауіпті маневр жасап, апатты жағдайлар тудыратын ауқатты отбасылардан шыққан жас жүргізушілер екені байқалады. Олар айыппұл төлеу кезінде 50% жеңілдікті пайдаланып, заңды өрескел бұзуды жалғастыра береді, сөйтіп көшелерді жауапсыз әрі қауіпті ойын алаңына айналдырады. Жүйелі түрде ереже бұзатындар үшін қазіргі айыппұл жүйесі тиімді шара емес екені анық, сондықтан мұндай құқық бұзушылықтар үшін жазалау тәсілдерін шұғыл түрде қайта қарау қажет", – деп мәлімдеді Қожаев.

Сенатор Германия мен Францияның тәжірибесін мысалға келтіріп, жүйелі ереже бұзушыларға қосымша жаза енгізуді ұсынды.

Осыған байланысты ол:

• Ережені 10 реттен артық бұзған жүргізушілерді теориялық емтиханды қайта тапсыруға міндеттеу;
• Жол ережесін қайта бұзғандарға айыппұлдан бөлек, уақытша жүргізуші куәлігінен айыруды қарастыру;
• Жүйелі заң бұзушыларға 50% айыппұл жеңілдігін алып тастау механизмдерін енгізуді ұсынды.