Сенатор жүргізуші куәлігін алу талаптарын күшейтуді ұсынды

Сенат депутаты Марат Қожаев Қазақстанда жүргізуші куәлігін алу тәртібін қайта қарауды ұсынды. Ол бұл туралы Сенат дәлізінде журналистердің сұрақтарына жауап беру кезінде мәлімдеді.

Сенатор құқық қорғау органдарында жұмыс істеген кезінде жол-көлік оқиғаларының себептерін жиі зерттегенін атап өтті.

"Қазақстанда жүргізуші куәлігін алу өте жеңіл. Ал әлемде бұл – өте күрделі процесс. Жүргізушілер арнайы дағдыларды меңгереді, көлік жүргізудің жоғары жауапкершілік екенін түсінеді және куәліктеріне немқұрайлы қарамайды," – деді ол.

Сенатор премьер-министрге депутаттық сауал жолдап, келесі шараларды жүзеге асыруды ұсынды:

• Жүргізушілерді дайындайтын оқу орталықтарына мемлекеттік бақылауды енгізу;
• Автомектептердің оқу бағдарламаларын жаңартып, жолдағы қауіпсіздік пен мәдениетке баса назар аудару;
• Жүргізуші куәлігін алу тәртібін қайта қарап, жаңа жүргізушілер үшін сынақ мерзімін енгізу.