Сенатор еңбек мигранттарының Қазақстанға кіруіне шектеу қоюды ұсынды

Сенатор Бибігүл Жексенбай Қазақстандағы көші-қон туралы нақты статистиканың жоқ екенін айтты. Оның сөзінше, бұл ел экономикасына үлкен әсерін тигізіп жатыр.

«Қазақстан заңсыз миграция маршруттарына енген. Бүгінгі таңда статистикаға сәйкес елде 300 мыңға жуық еңбек мигранты бар. Алайда Еңбек министрлігінің мәліметінше, тек 13,2 мың шетелдік ресми түрде жұмыс істейді», — деді сенатор.

Жағдайды күрделендіре түсетін тағы бір жайт — Бас прокуратураның деректері бойынша, биыл 82,2 мың шетелдік әкімшілік жауапкершілікке тартылса, 965 адам қылмыс жасаған. Сонымен қатар 1,2 мың жұмыс беруші еңбек мигранттарын рұқсатсыз жұмысқа тартқаны үшін айыппұл төледі.

Сенатор нақты мысалдар келтірді: Жамбыл облысында 20 пәкістандық азамат шекараны заңсыз кесіп өткені үшін жауапқа тартылған, Астанада бір ғана пәтерде 937 шетелдік тіркелген, ал Алматы облысында осындай 13 мың оқиға анықталған.

«Осындай тексерулерді басқа өңірлерде жүргізсе, көрсеткіштер бірнеше есе көп болатыны анық. Алматы, Маңғыстау және Жамбыл облыстарында мигранттардың көп шоғырланғаны байқалады», — деді ол.

Мәселені шешу үшін Жексенбай келесі шараларды ұсынды:

• біліктілігі жоқ жұмысшылардың елге кіруін шектеу;
• көлеңкелі еңбек нарығын реттеудің жаңа тәсілдерін әзірлеу;
• шекараларда көз қарашығын сканерлеу және саусақ ізін анықтау сияқты заманауи технологияларды енгізу арқылы бақылауды күшейту;
• мигранттардың нақты орналасқан жерін анықтау үшін геолокацияны қадағалау;
• мигранттарды заңсыз жұмысқа орналастырумен айналысатындарды қатаң жауапкершілікке тарту.

Сонымен қатар сенатор шетел азаматтарымен қиылған жалған некелер мен ажырасу фактілерін тексеруді ұсынды.