Сенатор Бибігүл Жексенбай этномәдени бірлестіктермен кездесті

Қазақстан Республикасы Парламенті Сенатының депутаты Бибігүл Жексенбай Жалпыұлттық коалиция шеңберінде Астана қаласында жаңа Конституция жобасының негізгі ережелерін түсіндіруге және талқылауға бағытталған бірнеше кездесу өткізді.

Алғашқы басқосу этномәдени бірлестіктер өкілдері мен Достық үйінің қызметкерлерінің қатысуымен ұйымдастырылды. Ашық диалог форматында өткен жиында қатысушылар көкейіндегі сауалдарын қойып, азаматтық қоғам институттарының конституциялық нормаларды жүзеге асырудағы рөлі мен тетіктері сөз болды. Кездесу өзара пікір алмасуға, ұсыныстар білдіруге және қоғамдық сенімді арттыруға мүмкіндік берген мазмұнды алаңға айналды.

Сенатор Бибігүл Жексенбай өз сөзінде Конституцияның қоғам өміріндегі стратегиялық мәніне тоқталып, оның тек заңгерлер қауымының емес, түрлі сала мамандарының, қоғам белсенділері мен азаматтардың қатысуымен әзірленген жалпыхалықтық, тарихи құжат екенін атап өтті. Оның айтуынша, Конституция – мемлекет пен азаматтар арасындағы басты қоғамдық келісім, онда мемлекеттік міндеттер мен әр азаматтың құқықтары және жауапкершілігі нақты айқындалады. Жаңа редакцияда адам құқықтары мен бостандықтарын қорғау тетіктері, жеке өмірге қол сұқпаушылық және дербес деректердің қауіпсіздігі едәуір күшейтілген.

Сонымен бірге сенатор институционалдық жаңашылдықтарға назар аударып, жаңа Конституцияда Парламенттің атауы ғана емес, өкілеттігі мен ықпалы да арта түсетінін жеткізді. Бұл билік тармақтары арасындағы тепе-теңдік пен өзара жауапкершілікті қамтамасыз етуге бағытталған маңызды қадам екені айтылды.

Кездесу қорытындысында Бибігүл Жексенбай Конституцияның тек құқықтар жиынтығы емес, ортақ жауапкершіліктің негізі екенін баса айтып, 15 наурызда өтетін бүкілхалықтық референдумға қатысып, азаматтық ұстанымды білдіру әрбір қазақстандықтың парызы екенін атап өтті.