Сенат депутаттары Ұлттық архив ұжымымен Конституция жобасын талқылады

Қазақстан Республикасы Парламенті Сенатының депутаттары Бибігүл Жексенбай мен Дархан Қыдыралі Қазақстан Республикасының Ұлттық архиві ұжымымен «Жаңа Конституция жобасы: негізгі бағыттар және қоғамдағы рөлі» тақырыбында кездесу өткізді.

Жиын барысында сенаторлар жаңа Конституция жобасының ел дамуы үшін айрықша маңызға ие екенін атап өтті. Олардың айтуынша, бұл құжат мемлекеттілікті нығайтып, Қазақстанның даму үдерісін жаңа сапалы кезеңге көтеретін стратегиялық бастама болып табылады.

Сенатор Бибігүл Жексенбай өз сөзінде жаңа Ата Заң жобасының тек құқықтық құжат қана емес, билік пен қоғам арасындағы жаңартылған қоғамдық келісімнің айқын көрінісі екенін айтты. Оның пікірінше, ұсынылып отырған өзгерістер азаматтардың құқықтары мен бостандықтарын кеңейтуге, мемлекеттік басқару жүйесін заманауи талаптарға сай жетілдіруге бағытталған. Сонымен қатар, дербес деректерді қорғау, жеке өмірге қол сұқпаушылықты қамтамасыз ету, балалар мен қоғамды зиянды ақпараттан сақтау сияқты маңызды қағидаттар құжатта ерекше орын алған. Бұл нормалар әр азаматтың күнделікті өміріне тікелей ықпал етеді.

Сондай-ақ ол референдумның маңыздылығына тоқталып, әрбір азаматтың дауыс беру арқылы тарихи шешімдер қабылдау процесіне қатысу мүмкіндігі бар екенін жеткізді. Оның айтуынша, әр дауыс – ел болашағын айқындайтын маңызды таңдау. Архив қызметкерлері тарихи мұраны сақтаушылар ғана емес, елдің рухани жадын қалыптастыратын, осы кезеңнің мәнін терең түсінетін кәсіби қауым екені де атап өтілді.

Өз кезегінде сенатор Дархан Қыдыралі Ұлттық архив қызметкерлерінің еңбегіне жоғары баға беріп, олардың жұмысы жаңа заң жобасын жүзеге асыруға тікелей ықпал ететінін айтты. Әсіресе, архив саласын цифрландыру, деректер қорын жетілдіру, материалдық-техникалық базаны күшейту, құжаттардың сақталуы мен қолжетімділігін қамтамасыз ету – реформаның басым бағыттарының бірі екеніне назар аударды.

Кездесу қорытындысында депутаттар 15 наурызда өтетін республикалық референдумның ел өміріндегі маңызын атап өтіп, азаматтарды маңызды саяси науқанға белсенді түрде қатысуға шақырды.