Семейде мұғалім 8-сынып оқушысын зорлағаны үшін өмір бойына бас бостандығынан айырылды

Семей қаласында мектеп мұғалімі кәмелетке толмаған оқушыны зорлағаны үшін өмір бойына бас бостандығынан айырылды. Бұл туралы Абай облыстық сотының баспасөз қызметі хабарлады.

Қылмыстық іс жабық сот отырысында қаралды. Іс материалдарына сәйкес, 2024 жылдың шілде айының соңында алғашқы әскери дайындық пәнінің 32 жастағы мұғалімі 8-сынып оқушысын Семейдің оң жағалауында автокөлік ішінде зорлаған.

Айыпталушы өз кінәсін мойындамаған, соттан ақтауды сұраған. Дегенмен сот оның кінәсі дәлелденгенін айтып, өмір бойына бас бостандығынан айыру жазасын тағайындады. Үкім заңды күшіне әлі енген жоқ.

Еске салайық, күдікті 2024 жылдың қарашасында ұсталған. Қалалық білім бөлімі өкілдерінің айтуынша, жәбірленуші қыз әлі де мектепке барып жүр. Оның ата-анасына бала құқықтары жөніндегі уәкілге және психологиялық көмек орталығына жүгіну ұсынылған.