Семей қаласында Амангелді Сейітханды еске алуға арналған республикалық турнир мәресіне жетті

Семей қаласында отандық бұқаралық ақпарат құралдары өкілдерінің қатысуымен өткен шағын футболдан дәстүрлі республикалық турнир өз мәресіне жетті. Айтулы спорттық шара қазақ журналистикасының дамуына өлшеусіз үлес қосқан көрнекті қайраткер, танымал спорт комментаторы Амангелді Сейітханның жарқын елесін мәңгілікке есте сақтау мақсатында ұйымдастырылды, деп хабарлайды Абай облысы әкімінің баспасөз қызметі.

Биылғы мемлекеттік деңгейдегі маңызы бар додаға Қазақстан Республикасының 6 облысы мен 4 республикалық маңызы бар қаласынан келген, құрамында кәсіби медиа мамандары жасақталған 12 таңдаулы команда қатысты.

Жалпыұлттық деңгейдегі ақпараттық кеңістіктің басын қосқан жарыс жолында «Qazaqstan TV» (Астана), «Абай облысы» (Абай облысы), «Aqmeshit» (Қызылорда облысы), «Атырау» (Атырау облысы), «Kazmedia» (Астана), «Qareket» (Жетісу облысы), «Семей» (Семей қаласы), «Setanta» (Алматы), «Тараз Пресс» (Жамбыл облысы), «Хабар» (Астана), «Шымкент» (Шымкент қаласы) және «Bek Sport» (Астана) сияқты жетекші телеарналар мен басылымдардың құрамалары бас жүлдені сарапқа салды.

Тарихына көз жүгіртсек, Амангелді Сейітхан атындағы «Seitkhan cup» республикалық турнирі 2022 жылдан бері дәстүрлі негізде өткізіліп келеді. Осыған дейін аталған спорттық жарыс Алматы қаласында төрт мәрте ұйымдастырылған болатын. Биыл Абай облысының әкімі Берік Уәлидің тікелей бастамасымен және қолдауымен бұл турнир алғаш рет белгілі журналистің туған жері - Семей өңірінде өткізіліп, ауқымды деңгейде мемлекеттік деңгейде ұйымдастырылды.

Турнирдің қорытындысы бойынша, аса тартысты өткен финалдық кезеңде Абай облысының құрамасы Астана қаласынан келген «Қазмедиа» командасымен кездесті. Ойынның негізгі уақыты тең аяқталып, жеңімпазды анықтау үшін тағайындалған пенальти сериясында Абай облысының командасы жоғары кәсіби шеберлік танытып, турнирдің бас кубогін иеленді.

Жарыстың салтанатты жабылу рәсімінде ресми жүлделер төмендегідей тәртіппен үлестірілді:

•  І орын және 2 миллион теңге көлеміндегі ақшалай сертификат — Абай облысының құрамасына;
•  ІІ орын және 1 миллион теңге көлеміндегі ақшалай сертификат — Астана қаласының «Казмедиа» командасына;
•  ІІІ орын және 500 мың теңге көлеміндегі ақшалай сертификат — Жетісу облысының «Qareket» құрамасына табысталды.

Сонымен қатар турнир барысында ерекше тактикалық және физикалық дайындығымен көзге түскен БАҚ қызметкерлері арнайы бекітілген мемлекеттік номинациялармен марапатталды. Олардың қатарында «Үздік сұрмерген», «Үздік қақпашы», «Үздік қорғаушы», «Үздік шабуылшы», «Үздік ойыншы», сондай-ақ спорттық этиканы сақтағаны үшін «Құрмет» және «Жеңіске деген жігері үшін» аталымдары бар.

Марапаттау рәсімінде сөз сөйлеген өңір басшысы Берік Уәли барлық қатысушы ұжымдарға кәсіби деңгейдегі ойын көрсеткендері үшін ресми алғысын білдірді.

«Біз бүгінгі республикалық турнирдің ұйымдастырылу деңгейі мен спорттық сапасы өте жоғары дәрежеде өтті деп есептейміз. Алаңдағы тартысты кездесулер мен мазмұнды ойын өрнегі осының айқын дәлелі болды. Барша Абай облысы тұрғындарының атынан Амангелді Сейітханды еске алуға арналған осы маңызды шараға арнайы келіп, Семей өңірінде нағыз спорттық және рухани мереке сыйлағандарыңыз үшін ризашылығымды білдіремін», – деді Берік Уәли.